InfoHub Logo

Qulpynaı – jaryqsúıgish ósimdik. Jıdegi qyzyl tústi, hosh ıisti bolyp keledi. Surpyna qaraı erte kóktemde, jazda, kúzde jemis beredi. Qulpynaı – dárýmenderge óte baı. Quramynda aǵzaǵa asa paıdaly S dárýmeni kóp. Onyń quramynda temir, magnıı, kalıı, kálsı, sınk, marganes, fosfor, kremnıı, mys pen ıod ta bar. Qys boıy dárýmen jetispeı álsirep shyǵatyn aǵzaǵa asa paıdaly. Quramyndaǵy kómirtekter qan quramyndaǵy qantty kótermeıtindikten, sahar dıabetine shaldyqqan adamdarǵa jeýge ruqsat berilgen. Jýyrda qulpynaıdyń rak kletkalarynyń ósýin baıaýlatatyndyǵy anyqtaldy.

Qulpynaıdyń paıdalary:

Dárýmen jetispeýshilikke óte paıdaly.

Tamyrdyń bitelýin aldyn alady jáne holesterındi túsiredi.

Aǵzany tazartyp, zárdi jáne terdi aıdaıdy.

Quramyndaǵy antıoksıdanttar qartaıý prosesin tejeıdi.

Imýnıtetti kúsheıtip, qan azdyqqa kómektesedi.

Mıkrobqa qarsy qasıeti joǵary bolǵandyqtan, asqazan aýrýy bar adamdarǵa asa paıdaly.

Júrek qan-tamyrlar júıesin qorǵaıdy.

Shek qurttaryn ketiredi.

Qandy tazartady, deneden ýly zattardy shyǵarady.

Tis etterin qýattandyrady, aýyz ıisin ketiredi.

Tynyshtaldyrady, kúızelisti azaıtady.

Qan qysymyn túsiredi, dene qyzýyn basady.

Revmatızm, búırek aýrýlaryna paıdaly.

Ǵalymdardyń aıtýynsha, qulpynaıdyń jeý normasy kúnine 500 gramnan aspaý kerek. Aǵzany qorektendirý úshin osy qalyp jetkilikti, basqalaı bolǵanda ishek joldarynyń qurtylýyna, al jaqsylap jýylmaǵan jaǵdaıda búırekte qum jınalýyna sebep bolýy múmkin. Jótel jáne ókpe aýrýlary kezinde qulpynaıdyń japyraqtaryn qaınatyp ishse, tez arada jazylyp ketýge bolady. Qulpynaıdy desert retinde jeıdi. Qulpynaıdyń paıdasyn arttyrý jáne organızmge sińimdirek bolý úshin, qaımaqpen nemese kilegeımen jeý kerek. Qulpynaıdan shyryn, tosap, djem jasaıdy. Hosh ıisi úshin parfúmerıada qoldanady.

Qulpynaıdy qalaı tańdaýǵa bolady?

Satylǵanda qulpynaıdyń gúlsabaǵy da mindetti túrde saqtalýy kerek. Sebebi gúlsabaǵynyń saqtalýy quramynda S dárýmeniniń qajetti mólsheri bolýyna kepil bolady.    

Óte úlken qulpynaı jıdekterine qaraǵanda ortasha jáne usaq jıdekterinde dárýmender kóbirek bolady.    

Qulpynaıdyń betki qabatynda túrli daqtar bolmaýy kerek. Bul qulpynaıdy ósirgende hımıalyq zattar qoldanǵandyǵyn kórsetedi.

Qulpynaıdyń ashyq qyzyl nemese qanyq qyzyl túrlerin  kezdestirýge bolady. Bul qulpynaıdyń ósken jerine, túrine baılanysty bolyp, árqaısysynyń ózindik dámi men erekshelikteri bolady.

Sapaly jıdekterdiń tabıǵı jaǵymdy ıisi bolady. Iisi baıqalmaıtyn jıdekterdiń "hımıa" kómegimen óskendigi belgili bolady.  

Onyń dámin tatyp kórýden qoryqpaý kerek. "Metaldyq dám" quramyndaǵy nıtrattyń kóptigin bildiredi.

---