InfoHub Logo

Alekeń K. qyzmetke alǵashqy kelgen kezde óte múláıimsip júrdi. Qaraýyndaǵy keıbir qyzmetkerlerdi sýaıt sózdermen baıyta bastady. Sonymen birge memlekettik múdde úshin qajetti jerinde qasyq qanyn qıatyn, eki sóziniń birinde: "Memleket qarjysy kózdiń qarashyǵyndaı saqtalsyn. Sýyq qoldy suǵanaqtarǵa jol berilmesin", — dep kóterile kókıtin edi. Buǵan MTS kollektıvi alǵashqy kezde senip te qaldy. "Jaqsy sóz, jarym yrys" — degendeı ashyq pikirli, adal jandy adam kórinedi. Sýyq qoldy suǵanaqtarmen batyl kúres júrgizetin kisi bolý kerek" — desip súısine maqtaýshylar da boldy.

Biraq, kóp ýaqyt ótpeı-aq Alekeńniń qulqyn qumarlyǵy sezile bastady. Senim serpilip, kúdik kóbeıdi. Sýyq qolyn suǵyna jumsap, tıyn tússe tyǵa saldy, mal kezdesse jyǵa saldy. Astyqty arbasymen asaı berdi, bárine jalǵan dokýment jasaı berdi... Sonymen naǵyz qulqynnyń quly Alekeńniń ózi boldy. Kúnderde bir kún:

Shaqyryp alyp Túgaıdy,
Otyrǵyzyp Hegaıdy,
İshine kire syr tartyp
Jaı jaǵdaıyn suraıdy.
"Senetinim sendersiń,
İsteriń maǵan unaıdy.
Túgaıym tym uqypty,
Tıynnan som quraıdy.
Hegaıym da qaıymshyl,
MTS-tegi jigittiń —
Qulaǵyn qunttap buraıdy ", —

dep, kópshik qoıa kólkeshteıdi Qulmatov.

Buǵan Túgaı men Hegaı masattana tústi. "Siz bizge senseńiz, biz de sizge senemiz, — dep, olar da qoldaryn usyndy.

Sol kúnnen bastap, sýyq qoldy suǵanaqtardyń ymy-jymy bir boldy da, obyr óńeshter obyǵa tústi.

Sýyq qoldy suǵanaqtardyń MTS mehanızatorlarynyń eńbek aqysynan jyryp jegenin vedomstydan "bildirmeı" jyryp qalǵan qarjylaryn aıtpaǵanda: onan-munan jula qashqan, bura tartqan tótenshe tabystary da biraz boldy.

Ótken jyly MTS dıirmenine sol jerdegi turǵan eńbekshilerden biraz astyq tartyldy, dıirmen aqysy úshin 6941 kılogramm astyq qabyldandy. Biraq, bul astyq MTS qoımasyna jetpeı-aq: "jerge tógildi" bolyp jol-jónekeı talan-tarajǵa ushyrady. "Motordyń piri menmin" dep bas mehanık Hegaı 409 kılogramyn qylǵytyp jiberdi. Qulmatovtyń qulqynyna da 486 kılogramm bıdaı súńgip ketti. 360 kılogramm bas býhgalter Túgaıdyń qabyna salyndy. Qalǵany dıirmenshi Katúev pen bul bólisti kórgenderge "kóz aqyǵa" ketti.

Kóktemde kolhozǵa 5 sentner tuqymdyq kúrish qabyldandy. Munyń 3 sentneri MTS podhozyna jumsaldy. Qalǵan eki sentnerinen bastyqtar kolhoz jerine "móldek" egip aldy. Árıne, bastyqtardyń "móldegi" MTS - tiń kúshimen salyndy. Jumsalǵan maıǵa da, jer aıdaǵan traktorshyǵa da qarjy memleket esebimen tólendi.

MTS-tegi baıyrǵy eki bıe jyl saıyn qulyndaıdy, biraq, týǵan qulyny ómiri eseıip esepke alynbaıdy. Jylǵa jetip, býyny bekisimen-aq "bir túndik" bola beredi. Sóıtip, sońǵy eki-úsh jyl ishinde týǵan qulyndar Alekeń men sybaılastarynyń qulqyndaryna tastaı batyp, sýdaı sińdi.

Taıaýda arba qaǵyp aıaǵyn aqsatqan ala qulynnyń alqymyna da qara pyshaq qadala qaldy. Eti sháńgekke ilinip satyldy da, tıyn-tebeni túgelimen qulyndatardyń qaltasyna túsip, joq boldy.

Endigi kezek "jutyp jiberý rezervindegi" ınventarǵa alynbaǵan qasqa qunan men bıylǵy týǵan eki qulynǵa kelip-aq tur. Talǵamaı jutatyn tilemsek óńeshter taǵy da tynymsyz búlkildeıdi. Janýarlar jutyla ma, álde ajaldan qutyla ma? Kim bilsin, ol áli belgisiz. Áıteýir búlkildegen tamaqtardyń astynda tur.

Sýyq qoldy suǵanaqtardyń suǵynbaǵan jerleri qalmady. Selponyń dúkenshisi Sarysýǵa baryp qaıtý úshin 500 somǵa MTS-tiń mashınasyn jaldady. Árıne, alynǵan aqsha qulqyndastardyń qurdym qaltasyna qulady da ketti. Sóıtip, ozbyr óńeshter zyr qaqqan dóńgelekti de ańdıtyn boldy.

Qulqynnyń quly bolǵandardyń alqymynan astyq ta, temir-tersek te, jún-jurqa da ótedi. Qaqalatyn kezi jetken joq pa?!

---