InfoHub Logo

Qyrǵyzstan men Tájikstan shekara máselesin sheship,kelisimge qol qoıyldy.Bul týraly Infohub.kz tilshisi habarlaıdy.

13 naýryzda Qyrǵyzstan prezıdenti Sadyr Japarov pen Tájikstan basshysy Emomalı Rahmon eki el arasyndaǵy memlekettik shekaranyń delımıtasıasy men demarkasıasy týraly tarıhı kelisimge qol qoıdy. Bul kelissózder Qyrǵyzstan prezıdentiniń ákimshiligi ornalasqan «Yntymak Ordo» ǵımaratynda ótti.

Resmı aqparatqa sáıkes, memleket basshylary shekara qyzmetiniń basshylaryna eki el arasyndaǵy ótkizý beketterin qaıta ashýǵa ruqsat berdi. Osy sheshimniń nátıjesinde «Qaıragach» (Leılek aýdany) jáne «Qyzyl-Bel» (Batken aýdany) beketteri qaıta jumys isteı bastaıdy. Bul shekara beketteri 2021 jyly eki el arasyndaǵy qaqtyǵystardan keıin jabylǵan bolatyn.

Qyrǵyzstan men Tájikstan arasyndaǵy shekara máselesi uzaq jyldar boıy ekijaqty qarym-qatynastardyń basty túıtkilderiniń biri bolyp keldi. Keńes Odaǵy taraǵannan keıin eki eldiń arasyndaǵy 970 shaqyrymdyq shekaranyń keıbir bólikteri naqty belgilenbeı qalǵan. Sonyń saldarynan sońǵy jyldary eki memleket arasynda birneshe ret qarýly qaqtyǵystar oryn aldy.

Bıylǵy 21 aqpanda Qyrǵyzstan men Tájikstan úkimettik delegasıalary shekara máselesine qatysty qorytyndy hattamaǵa qol qoıǵan bolatyn. Bul kelissózder nátıjesinde taraptar shekarany tolyq anyqtaý jáne daýly aımaqtardy retteý týraly ortaq sheshimge keldi.

Bul kelisim eki el arasyndaǵy beıbitshilik pen turaqtylyqty nyǵaıtýǵa baǵyttalǵan mańyzdy qadam bolyp otyr. Sarapshylardyń pikirinshe, shekara beketteriniń qaıta ashylýy ekonomıkalyq jáne áleýmettik baılanystardy jandandyryp, shekara mańyndaǵy turǵyndardyń ómirine oń áser etedi.

Qyrǵyzstan men Tájikstan basshylarynyń qol qoıǵan bul kelisimi aımaqtaǵy qaýipsizdik pen yntymaqtastyqty nyǵaıtýǵa úlken úles qosady dep kútilýde.