InfoHub Logo

Qazaqstanda ádette bir myqty basshysy bar, joǵarydan tómen qaraı júıesi qalyptasqan aýyldardy úlgi tutady. Alaıda, Qyzylorda oblysyndaǵy Besaryq aýyly múldem basqasha damý úlgisin kórsetedi. Munda 450 otbasy 20 jyl boıy eshbir jeke ıesinsiz, ujymdyq negizde mıllıard teńgege jýyq tabys ákeletin sharýashylyq qurǵan. Bul týraly bloger jáne agrofermer Juldyz Ǵafarova málimdedi.

Bul týraly Infohub.kz aqparat agenttigi habarlaıdy.

Ujymdyq sharýashylyqtyń nátıjesi

Besaryq aýylynyń turǵyndary birlesip 10 myń bas iri qara mal baǵyp, myń gektar jerge kúrish egedi. Bul shamamen 580 mıllıon teńgege jýyq shıki kúrish satylymynan túsetin tabys bolsa, tazartylǵan kúrishtiń kóleminde bul kórsetkish 960 mıllıon teńgege jetedi. Iaǵnı, 450 otbasy jylyna shamamen bir mıllıard teńge tabys tabady.

Bul úlginiń «Rodına» aýylynan basty aıyrmashylyǵy – munda bárin bir adamnyń bastap, salyp shyǵýy bolmaǵan. Turǵyndar bul júıeni 20 jyl boıy birlesip, ujymdyq negizde qurǵan.

Bıznes-ınkýbator jáne kooperatıv

2024 jyly «Aýyl Amanaty» memlekettik baǵdarlamasy aıasynda aýylda jergilikti kásipkerler úshin tegin bıznes-ınkýbator iske qosyldy. Jobaǵa 642 mıllıon teńge jumsalyp, onyń 465 mıllıon teńgesin «Abaı-Dáýlet» JSHS bóldi. Qazirgi tańda munda jartylaı fabrıkattar, kartop-frı, kondıterlik jáne nan-toqash ónimderin, plasık ydys, sabyn, aǵash jáne toqyma buıymdaryn shyǵaratyn sehter jumys isteıdi. Bul 25 jańa jumys ornyn ashty.

Inkýbator rezıdentteriniń biri, Gúlzıra Rysym 6 mıllıon teńge jeńildikti nesıe alyp, jumys qolǵaptaryn shyǵaratyn óndiris ashqan. Onyń aıtýynsha, ónimge suranys joǵary, baǵasy naryqtyqtan tómen.

Sondaı-aq, 2024 jyly aýylda «Syr Qusy» atty aýylsharýashylyq óndiristik kooperatıvi qurylyp, jylyna 100 tonna qus etin óndirý qýattylyǵyna ıe boldy. Ónimder qazirdiń ózinde oblys saýda oryndaryna jetkizilýde.

Áleýmettik jaýapkershilik

Besaryq aýylynda 2400 adam turady. Munda 360 oryndyq mektep, 120 oryndyq balabaqsha, 10 úıirmesi bar mádenıet úıi, kúndizgi stasıonary bar ambýlatorıa, 14 dáriger jáne jedel járdem kóligi bar. 2024 jylǵy mektep bitirýshilerdiń ortasha baly – 80%, úsheýi «Altyn belgi» ıelendi.

2024 jyldyń qorytyndysy boıynsha Besaryq aýyly «Úlgili eldi meken» baıqaýynyń jeńimpazy atandy.