InfoHub Logo

Qyzylorda oblysynda «Taza Qazaqstan» respýblıkalyq ekologıalyq baǵdarlamasy aıasynda aýqymdy tazalyq aksıasy ótti. Sharaǵa oblys ákimi Murat Ergeshbaev qatysyp, qorshaǵan ortany qorǵaýǵa úles qosqan 100 qyzmetkerdi marapattady.

Bul týraly Infohub.kz aqparat agenttigi habarlaıdy.

Botanıkalyq saıabaqta ótken aksıaǵa oblys boıynsha 17 myńnan astam adam qatysty. Olardyń qatarynda zıaly qaýym ókilderi, depýtattar, memlekettik mekeme qyzmetkerleri, jastar men ekobelsendiler boldy.

Aımaq basshysynyń sózi

Oblys ákimi Murat Ergeshbaev memleket basshysynyń «Tazalyq – órkenıetti qoǵamnyń aınasy» degen sózin eske alyp, qorshaǵan ortany qorǵaý ár azamattyń mindeti ekenin atap ótti. Onyń aıtýynsha, óńirde sanıtarlyq tazalyq pen abattandyrý jumystary qarqyndy júrgizilýde. Qalanyń birqatar demalys oryndary qaıta jańǵyrtylyp, paıdalanýǵa berilgen. Sondaı-aq, 80-nen astam eski turǵyn úıdiń qasbetteri zamanaýı úlgide jańartylǵan.

Tehnıkamen qamtamasyz etý

Ekologıalyq ınfraqurylymdy nyǵaıtý maqsatynda salalyq mekemelerge 26 arnaıy tehnıka tabystaldy. Olardyń qatarynda qaldyq tasymaldaıtyn kólikter, órt sóndirý tehnıkalary, traktorlar jáne kishi órt sóndirý keshenderi bar.

Jasyl jelek jáne senbilik

Botanıkalyq saıabaq aýmaǵyna 500 túp qylqan japyraqty aǵash otyrǵyzyldy. Bul jumystar óńirdi jasyl jelekke bóleýge, aýa sapasyn jaqsartýǵa baǵyttalǵan. «Taza Qazaqstan» baǵdarlamasy aıasynda oblystyń barlyq eldi mekeninde aýqymdy senbilik jáne abattandyrý jumystary uıymdastyryldy.

Jyl basynan bergi kórsetkishter

Jyl basynan beri óńirdegi ekologıalyq sharalarǵa 121 myńnan astam adam qatysty. Osy ýaqyt ishinde 3 myń tonnadan astam turmystyq qaldyq shyǵarylyp, skverler, parkter, tarıhı-mádenı eskertkishter, áleýmettik nysandar, sý obektileri men kóshe boılary tazartyldy. Bul jumystarǵa 548 arnaıy tehnıka jumyldyryldy. Sonymen qatar, 88 myńnan astam aǵash kósheti otyrǵyzyldy.