- 07 qań. 2020 00:00
- 266
Raqymnyń ómir tolǵaýy
Erenqabyrǵa óńirinde on saýsaǵy túgel óner Raqym degen sheber ótken. ol qazaq halqynyń mádenı ómiri men zattyq turmysyna qajetti buıymdardy óner óresine kótergen, ónermen qalyń qaýymǵa tanylǵan sheber edi. Raqym tikken saptama etikti, kóksaýyr kebisti, oıý basqan mási men kúmis belbeýdi jurt qadyr tutqan. Raqymnyń taýtekeniń múıizinen jezben oıýlap jasaǵan sary ala shaqshasy, sol zamannyń qoly jetkenderi maqtanyshpen alyp júretin zinnat buıymy bolǵan, dese de Raqymnyń sheberligin elge aıyryqsha tanytqan óneri — onyń jasaǵan dombyrasynyń kórkemdigi men sheshendigi eken. Raqym sheberlik óneriniń syrtynda, asqan dombyrashy da bolǵan kisi. onyń mundaı qasıetine óz qolymen jasaǵan dombyrasynyń oıdaǵydaı sheshen de, kórkem bolýy negiz bolatyn. Sondyqtan ol dombyranyń qulaǵynan tıegine deıin ózi ornalastyryp, árbir perneni ornyn taýyp baılap qolynan bir-aq shyǵarǵan. Dombyra alýǵa kelgenderge Raqym aldymen óz kúıi «ómir tolǵaýyn» tartady eken. «Ázir attanamyn» dep otyrǵan júrginshiler Raqymnyń kúıin qımaı, aqyry atynyń erin alýǵa májbúr bolady eken. Mine, osylaı «ómir tolǵaýy» jurttyń júrek qylyn terbetetin kúıge aınalǵan. Raqymnyń kóptegen shákirti, nemese Raqym qolynan shyqqan dombyrany ustaıtyn dombyrashylar qashan, qaı jerde bolsyn ózderiniń kúıin Raqymnyń «ómir tolǵaýymen» bastaıtyn bolǵan.