InfoHub Logo

Bilim jol bárine ańsarly,
Oı zerek bolsa oǵan unadyń.
Senderdi kúlimdep qarsy aldy
Mektepte meıirimdi muǵalim.

Qarsy aldy synybyń, partań da,
Tártippen sen oǵan unadyń.
Júredi kúlimdep ortańda
Taǵy sol meıirimdi muǵalim.

Ustazyń, meıirban úni tym,
Qaqpaıdy tym qatty betińdi.
Qoǵamnyń kishkentaı úmitin
Baptaıdy jas shybyq sekildi.

Ustazdyń san qyrly álemi,
Sanasy, júregi – asqaq ar.
Qoǵamǵa qurmet áýeli
Ustazdy syılaýdan bastalar.

Shákirtter osynda keledi,
Ózine jańasha dos tabar.
Elińe qurmet áýeli
Mektepti súıýden bastalar.

Keshegi ulylar izisiń,
Ótkizbes bosqa ár kez ýaqytty.
Otannyń ulysyń, qyzysyń,
Otany bar adam baqytty.

Árqashan qamyn jer balanyń
Anańdy shattyqty kúıge engiz.
Qut bolsyn bilimde qadamyń,
Birinshi synyptyq ul men qyz.

Bárine tym ystyq kóringen
Estısiń qońyraý únin kep.
“Jaqsy oqy” degendeı senimmen
Senderge eliń tur kúlimdep.


Olardyń birinshi synyptyń tabaldyryǵyn attaǵany kúni keshe ǵana sıaqty edi, endi, mine, bastaýysh synyppen qoshtasatyn kúnderi de kelip jetti.

Olardy osy jyldar ishinde alǵashqy ustazdary qabyldap aldy, tálim úıretti, ómir álippesimen tanystyrdy, keleshekke jeteledi.

Bastaýysh synypta sabaq bergen ustazdary olardy bilim negiziniń syryna baǵyt aldyrdy, óz áleminde oılanýǵa úıretti, tanym baspaldaǵyn qalyptastyrdy, aınala orta, qoǵammen qarym-qatynastaryn izgilikke baǵyttady, jazý, sóıleý mádenıetiniń alǵashqy syrlaryn ashty, ózindik shyǵarmashylyq álemine baýlydy, bolashaq jeke tulǵanyń qalyptasýyna, damýyna jaǵdaı jasady, búgingi shybyqtyń erteńgi qoǵamy men Otanyna septigin tıgizer máýeli báıterek bolaryn qazirden oılady, jan-jaqty jol ashty. Osy úshin bala tárbıesi ǵylymynyń sony tásilderin izdenip, talaı keshteri men túnderin uıqysyz ótkizdi. Osynyń barlyǵy da táýelsiz Otannyń jas bóbegi úshin jasalǵan edi.

Endi olardyń da, olardy ósirgen ata-analarynyń da osy bir izgi qyzmet úshin bastaýysh synypqa, onyń ustazdaryna da raqmet aıtatyn kúnderi kelip jetipti.

Eger Ustaz eńbegi ólsheýsiz bolyp sanalsa, ol eńbektiń alǵashqy qomaqty úlesi bastaýysh synyp ustazynyń izdenis tanytýynda jatyr.

Baldyrǵan sana eresek tartqanda da bilimniń alǵashqy baspaldaǵy bop sanalar osy bir bastaýysh synyptaǵy kúnderin esterine alatyn bolady jáne alǵashqy ustazdaryn da. Óıtkeni olardyń eresek aǵa-ápkeleriniń barlyǵy da osy joldan ótken.

Taǵy da qońyraý soǵyldy. Biraq bul qońyraýdyń úni olar úshin sońǵy qońyraý emes. Olardy áli ǵylym men ǵylymnyń arasyn baılanystyryp jatqan talaı jaýapty qońyraýlardyń úni kútip tur.

Olar sál eseıdi. Bul eseıýde alǵashqy ustazdarynyń da tynymsyz ter tókken eńbegi jatyr.

Bastaýysh synyptyń bal bulaq kúnderi artta qalyp, olar bolashaqqa asyǵady. Taǵy da bilim almaq úshin.

Endi bastaýysh synyp baldyrǵany ózderiniń ustazdaryna raqmet aıtpaq.

Raqmet, ustazym, myń alǵys!

Úıretip ómirde taǵylym,
Ustazdyq kóńilmen sendińiz.
Uqtyryp tirshilik tálimin,
Jetelep bul shaqqa keldińiz.

Bastaýysh – bilimniń bulaǵy,
Sanany jetiltti, ózgertti.
Qoıylyp endi ómir suraǵy,
Onymen qoshtasar kez kepti.

Keleshek bul kúndi bilmese,
Onda ár jyl belesin ataı ket.
“Alǵashqy ustazyń kim?” dese,
Aıtamyz: “Ol – bizdiń apaı!” dep.

Alǵashqy ustaz ol – meıirban,
Elińdi, Otandy súı depti.
Qınalsań, shyǵýdy qıynnan,
Jalyqpaı bizderge úıretti.

Erteńdi bilim dep ataıdy,
Sol jolmen keleshek utamyz.
Sondyqtan ómirde apaıdy
Ár kezde qurmet tutamyz.

Úles ap biz de áli ómirden,
Samǵarmyz, juldyz bop turarmyz.
Sondyqtan shynaıy kóńilmen:
Raqmet, ustazym, myń alǵys!

Júgirip qasterli kún úshin,
Oıatty kóńildiń qushtaryn.
Bári de jasaldy biz úshin,
Sol úshin raqmet, ustazym!

---