InfoHub Logo

AQSH-tyń prezıdenti Donald Tramp Reseıge qarsy qoldanylyp kelgen sanksıalardyń merzimin resmı túrde taǵy bir jylǵa uzartty. Bul týraly Federaldy reestr saıtynda jarıalandy. Buǵan deıin bul shekteý sharalaryn 2021 jyly Djo Baıden №14024 jarlyǵy negizinde engizgen bolatyn.

Atalǵan sanksıalar Reseıdiń AQSH-tyń ishki isine aralasýyna, kıbershabýyl uıymdastyrýyna, saılaý prosesine yqpal etý áreketterine, sondaı-aq Reseıdiń óz ishindegi opozısıa men erkin BAQ-qa qysym kórsetýine baılanysty qabyldanǵan edi. Qujat sheńberinde kóptegen reseılik jeke jáne zańdy tulǵalarǵa, sondaı-aq memlekettik qurylymdarǵa sanksıalar salynǵan.

Tramp sanksıalardy uzartý týraly sheshimin túsindirip, "Reseıdiń AQSH-qa qarsy áreketteri báseńdegen joq, sondyqtan ulttyq qaýipsizdik úshin bul sharalardy saqtaý qajet" dep málimdedi.

Sonymen qatar, Tramp bıylǵy 27 aqpanda taǵy bir mańyzdy qujat – №13660 jarlyqtyń merzimin de uzartty. Bul jarlyq Barak Obama tusynda qabyldanǵan jáne Reseıdiń Ýkraına egemendigi men aýmaqtyq tutastyǵyna qarsy áreketterine jaýap retinde ázirlengen.

Osy aptanyń ózinde AQSH pen Reseı arasynda Ýkraınadaǵy soǵysty toqtatý jaıly birneshe kelissóz ótti. 11 sáýirde Tramptyń arnaıy ókili Djeıson Ýıtkoff Máskeýde Reseı prezıdenti Vladımır Pýtınmen kezdesip, bul eki aı ishindegi úshinshi kezdesý boldy. Alaıda Reseı tarapy áli de bolsa qaqtyǵysty toqtatýǵa daıyn emes ekenin baıqatyp otyr. 13 sáýirde Reseı kúshteri Ýkraınanyń Sýmy qalasyna soqqy jasap, 32 beıbit turǵyn qaza tapty.

Axios agenttiginiń habarlaýynsha, AQSH sáýirdiń sońyna deıin soǵysty toqtatýdy talap etken. Eger bul oryndalmasa, Vashıngton sanksıalardy odan ári kúsheıtýdi kózdep otyr. Tramp buǵan qosa, Reseıden ımporttalatyn taýarlarǵa kedendik baj salyǵyn kóterý jáne munaı sektoryna qosymsha shekteý engizý josparyn jarıa etti.