InfoHub Logo

Ótken ǵasyrda Kishi júzdegi Bókeı ordasyna qarasty Naryn qumyn meken etken Jasybaı degen dúmshe molda bolypty, mańaıyndaǵy eldiń qoı-qozy, eshki-laqtaryn urlap soıyp jeı beredi eken. Dindi betke ustap, urlyq jasaǵan Jasybaıdyń bul qylyǵyn sol mańaıdaǵy elder kóp ýaqytqa deıin bilmepti.

«Ańqaý elge aramza molda» bolyp, Jasybaı da júre beripti. Jasybaı urlyq jasaýǵa barynsha epti, aılashyl adam eken. Tipti el Jasybaı molda urlyq jasaı qoıady dep te oılamapty. Al mal urlaýǵa ábden qunyqqan moldanyń arany burynǵydan da ashyla túsedi. Ol endi qoı-qozy, eshki-laq urlap qana qoımaı, aıyna bir ógiz ne taı urlaýdy ádetke aınaldyrypty. Sóıtip moldekeń urlap soıǵan maldyń jyly-jumsaǵyna sylqıa toıyp alyp, «Qudaıyna» syıynyp júre beripti.

Qoı-eshki, taı-tanalary iz-tuzsyz joǵalyp kete bergen soń, el adamdary birlesip qalaıda uryny ustap, jazalaýǵa bel baılaıdy. Syrttan kelgen ury bolmaıdy. Endi urynyń óz ishterinde ekenin sezedi. Joǵalǵan mal ıeleri ózara aqyldasyp: «Áı, osy bizdiń malymyzdy qyryp júrgen moldekeńniń ózi bolar-aý»,  —dep kúdiktenip, Jasybaıdyń izin ańdı bastaıdy. Jazdyń bir ádemi túninde el uıqyǵa jatar mezgilde kórshiles aýyldardyń bes-alty jigiti eshbir adamǵa sezdirmeı, Jasybaı úıiniń syrtyna kelip, baqylap júredi. Molda ne aıtyp otyr eken dep, dybys tyńdaıdy. Aramza molda kókoraı shalǵynnyń ortasyna tigilgen alty qanat aq úıiniń qaq tórinde shirenip otyryp, aldyńǵy kúni ózi urlap ákelgen semiz baǵylannyń etine meılinshe toıyp alyp, basyndaǵy sáldesine óte rıza bolyp, mynadaı aıat aıtyp otyr eken:

«Iah, Alla, jaratýshym Haq,
Bir Qudaıym óziń maǵan jaq.
Paıǵambar, perishteler jar bolyp,
Kúnámizden etkeı edi-aý pák!
Ár ýaqyt rızamyn, sáldem, saǵan,
Sen turǵanda eshkim kúmándanbaıdy maǵan.
Aq sáldemniń arqasynda
Aıynda ákelem bir tana,
Kúnde jeımin sylqyldama...»

Moldanyń osyny aıtyp bolýy-aq muń eken, manadan syrtta tyńdap turǵan jigitter úıge kirip kelip: «O, qarǵys atqyr Jasybaı, sharıǵat ustaǵan molda dep júrsek, qandy balaq ury ekensiń ǵoı. Ustaldyń ba, bálem, endi sazaıyńdy bereıik!» — dep sabap-sabap aıaq-qolyn baılap tastapty da, aýyl shetinde jatqan moldanyń bar qoıyn ózderi joǵaltqan maldarynyń tóleýine aıdap ketipti. Sóıtip, halyq ury moldadan osylaısha kek alǵan eken.

---