InfoHub Logo

Aldaǵy 4 jyldyń ishinde 3-4 jastaǵy balalar 100 paıyz mektepke deıingi bilimmen qamtylady. Bul týraly búgin QR Bilim jáne ǵylym mınıstrliginiń keńeıtilgen alqa májilisinde vedomstvo basshysy Erlan Saǵadıev málim etti.

«Eń birinshi - mektepke deıingi tárbıe men oqytý. Bizdiń maqsatymyz 4 jyldyń ishinde 3-6 jastaǵy balalardy mektepke deıingi bilimmen qamtý. Ol úshin ne istep jatyrmyz? Birinshiden, endi jetispeıtin balabaqshalardy ashý úshin memlekettik jekemenshik seriktestikti damytamyz. Memleket basshysy aıtyp ótkendeı, bul baǵytta bizde jaqsy nátıjeler bar. Tek qana 2016 jyly 77 myń orynǵa arnalǵan 825 mektepke deınigi bilim berý uıymy ashyldy. Sonyń ishinde 600-i jekemenshik balabaqsha», - dep atap ótti mınıstr.

Onyń aıtýynsha, osynyń arqasynda 3-6 jastaǵy balalardy balabaqshamen qamtamsyz etý 81 paıyzdan 85 paıyzǵa deıin artqan.

«Endi munan ary ne isteýimiz kerek? Jańa normalardy qabyldaýymyz kerek. Bular oryn tapshylyǵynyń birden-bir sebebi. Jańa sanıtarlyq normalar úsh aı talqyǵa tústi. Myńdaǵan maman óz pikirlerin berdi. Olardyń barlyǵyna rahmetimizdi aıtamyz. Jańa sanıtarlyq normalar tıisti memlekettik organdarmen kelisilgennen keıin qabyldanatyn bolady. Ony 1-2 aıdyń ishinde sheshemiz», - dedi Saǵadıev.

---