InfoHub Logo

Ertede ózinen basqany mensinbeıtin, tákapparlyǵymen dúıim elge aty shyqqan Toqsoba degen bir baı adam bolypty. Sol kisi kúnderdiń kúninde salt atpen jolaýshylap kele jatsa, bir aýyldyń irgesinde qozy baǵyp júrgen segiz-on jastar shamasyndaǵy balaǵa kezdesedi.

Salt atty jolaýshy jaqyndaı bergende bala eki qolyn keýdesine qoıyp, ıilip sálem beripti. Mańaıynda maly, jelige baılanǵan bıesi kóp osy úıge túsikisi kelgen jolaýshy erinderin bolar-bolmas qımyldatyp, qoıshy balaǵa kóz qyryn salmaı óte beripti de, kenet atynyń basyn irkip, jón surapty.

— Balam, myna qozy kimdiki? — deıdi.

— Qozy qoıdiki, — deıdi úlken adamnyń sálemdi durys almaǵany kóńiline kelgen bala.

Boıy qamshynyń sabyndaı ǵana qara domalaqtan mundaı jaýap kútpegen jolaýshy:

— Ákeńniń aty joq pa edi? — dep edireıedi.

— Ákemniń aty tolyp jatyr. Qara aty bar, tory aty bar, sary aty bar, qula aty bar, — dep kishkentaı taqyldaq shubyrta jónelipti.

Amaly taýsylýǵa aınalǵan tákappar baı pushpaq bórkin bir jaq shekesine qaraı qısaıta kıgen boıy tapqyr balaǵa ne aıtaryn bilmeı, oılanyp qalady. Sálden keıin jan qaltasynan taýtekeniń múıizinen jasalǵan shaqshasyn alady da, erdiń qasyna tyq-tyq qaǵyp jiberip, erniniń astyna ýystap tóńkere salady. Tiliniń ushymen nasybaıdy qoǵamdap, shyrt-shyrt túkire bastaǵan salt attyǵa bala qarap turady da:

— Ata, myna shaqsha neniń múıizinen jasalǵan? — dep suraıdy. «Tosylar jeriń endi kelgen shyǵar» dep mıyǵynan kúlgen shal:

— Bul qoıannyń múıizinen jasalǵan, — depti uzyndyǵy jarty kezdeı kúmistelgen qara shaqshany salmaqtaı turyp.

Sonda bala:

— Ee, azǵannyń jeri tozǵan degen ras eken. Bizdiń el qoıannyń múıizinen shańyraq oıýshy edi, sizderdiń el ony tek shaqshaǵa ǵana jaratady eken, — depti.

Sálemdi durys almaǵany úshin sózden tosylyp, sazasyn jas baladan alǵan Toqsoba aldyndaǵy elge toqtamastan ári asyp júrip ketipti.

---