InfoHub Logo

Baıaǵyda bir kedeı kósherge kóligi bolmastan, jyl saıyn qystaýda qala beredi eken. Bir kúni onyń úıine eldi súlikshe sorǵan bir ulyq kelipti.

— Seni jarly qylǵan men emes em, jazǵan Qudaıyńa jyla. Jan basy alpys qadaq bıdaıdan, úıińdegi alty adamǵa toǵyz put astyq tóleısiń, — dep ulyq qıǵylyq salyp otyryp alypty.

Jalǵyz sıyrdyń sútine qarap otyrǵan jarly baıǵus qalaı maqul deı qoısyn, qatty sasypty. Aýyl-aımaqqa sheshendigimen aty shyqqan qarshadaı ǵan  kedeıdiń bir balasy bar eken.  

Ulyq sol balany shaqyryp alypty da:

— Bala, seni jurt sheshen desedi. Myna ákeńdi bıylǵy alym-salymnan bosataıyn, sol ónerińdi kórsetshi! Máselen, adamǵa myna kóz, muryn, qol men aýyzdyń qanshalyqty keregi bar? Osyǵan oılanyp jatpastan, taban astynan jaýap taýyp aıta qoıshy, qane! — depti.

Sonda bala turyp:

— Taqsyr, qapylysta shyqqan sóz qanjardan ótkir kelýshi edi. Jazataıym qytyǵyńyzǵa tıip ketkendeı bolsam, bizdeı pendeńizge áńgirtaıaq oınatyp júrmes pe ekensiz? — depti.

— O, ol ne degenińiz?! Sóz tapqanǵa qolqa bar ma? Jaýabyń nanymdy bolsa, jazǵyrar jaıym joq. Sóıle, qorǵanba! — depti ulyq.

— E,  ulyq basymen ýáde berip, qarshadaı bala seniń sózińe ókpelep ne kórinipti? Bárimiz de kýámiz? — desip, ulyqtyń qasyndaǵy nókerleri de qaýmalap áketken soń, bala:

— Olaı bolsa taqsyrym, Sóıleıin sózdiń tap shynyn:
Kóz degen kópti úıirýge kerek,
Qol — jarlynyń malyn jylatyp alýǵa kerek,
Aýyz — alǵanyńdy kómeıge salýǵa kerek, — degen eken.

Uıalǵanynan qulaǵyna deıin qyzaryp, qasyndaǵylardyń betine qaraı almaǵan ulyq:

— Qap! Myna júgirmekke tipti daýa joq eken! — dep, atyna minip, jónine júre beripti.

---