Shedireıip, shekıip,
Qasyn kerip kekıip,
Qoldan pishin jasaǵan,
Bireý keler sekıip.

Shyrt túkirip, shyntaqtap
Júz qubylyp, qyltaqtap.
«Sulýyn-aı shirkinniń»
Degizbekshi jurt maqtap.

Munymen maqtaý almaq pa?
Shamalap óziń salmaqta.
Munsha ádemi kórinip,
Kóńli qyzǵa barmaq pa?

Men qyz emes, óziń qyz,
Osy kúnde syndasyz.
Óz betińdi óziń buz,
Úıte almaımyz, janym, biz.

Boıaǵan pishin bola ma,
Ony qylǵan ońa ma.
Erte bastan aıtqanym –
Sol pishinge jolama.

Bir sal moıyn sal keler,
Omyraýy dal keler.
Baqaıynan kelmes-aq,
Ózinen basqa pendeler.

Qulaǵyn kıer tymaqtyń,
Moıny bostaý shyraqtyń.
Mas kisideı taltaqtar,
Osyny qaıtip unattyń?

Júrse, tursa, bulyqsyp,
Munysy tapqan qylyqsyp,
Óner qylar, at miner,
Jyǵyla jazdap tolyqsyp.

Osyndaı salǵyrt salymyz,
Kóterip attan alyńyz.
Aıaǵyn jerge anyqtap
Basa almaıdy, nanyńyz.

Ózine-ózi óń bergen,
Terisin túzep jóndelgen.
Osyndaı sheber elde kóp,
Óz qylyǵyn jón kórgen.

Sen ózgerme, óziń bol,
Jaratty ǵoı, bolar sol.
Qudaıdan sheber bolmassyń,
Qylmaı-aq qoı onan mol.

Esil túzý pishindi,
Túzete almaı qysyldy.
Sen qubylmaı tek otyr,
Túzetsin Qudaı ishińdi.

---