Sóz jazamyn túnimen,
Bar uıqymdy qashyryp.
Tyǵyp qoıman muny men
Esh adamnan jasyryp.

Men ketermin, sóz qalar,
Aq qaǵazǵa basylyp.
Bozbalalar qolǵa alar,
Ár aýylǵa shashylyp.

Oqyrsyń da qolǵa alyp,
Sózdiń mánin tabarsyń.
Óz sózińe óń salyp,
Daýdy júndeı sabarsyń.

Bolmasam da qasyńda,
Aldy-artymdy qamarsyń.
Mıyń bar ma basyńda,
Baıqastamaı shabarsyń.

Bilimdi jurttyń aqyny
Bizdiń sózdi synamas.
Jazýshynyń jaqyny –
Qazaq muny unamas.

Synatarsyń ózińdi,
Meniń túgim qýramas,
Ólgen kisi «sózimdi
Synama» dep suramas.

«Synasyn» dep jazǵamyn,
«Synama» dep shatpaımyn.
Qazaqtyń minin qazǵamyn,
Aıtqanymnan qaıtpaımyn.

Qazaq synshy bolsa eken,
«Bolmasyn» dep aıtpaımyn.
Jetegime erse eken,
Ólsem de tynysh jatpaımyn.

Men jetelep ólemin,
Órge qaraı qazaqty.
Ólsem de oıyn bólemin,
Sózben salyp azapty,

Bilimdiniń sózindeı,
Sózim demen taza, aq-ty.
Qazaq bolsa ózimdeı,
Qyla almaıdy mazaqty.

Qazaqtyń jaıy belgili,
Óleńi óńkeı qurama,
Baıqadyń ǵoı endigi,
Ony menen surama.

«Aýylym qondy Nuraǵa,
Mingen atym sur ala» –
Kereksiz sózben burala,
Qazaq súıtpeı tura ma?

Sózimdi ólshep qarańyz,
Ýázinge dál shyǵa ma?
Qazaq degen balańyz,
Ýázindi de uǵa ma?

Sózdi ánge durystap,
Ólsheýmenen syǵa ma.
Syımasa da syryqtap,
Zorlyq qylyp tyǵa ma?..

---