InfoHub Logo

Jazdyń basy. Kún yssy. Demalys kún. Taýdaǵy dachada túske deıin kúrekpen jumys jasadym da, jýynyp - shaıynbaqqa tómenge, ózen boıyna tústim.

Jer qazyp, eńbek etken adamnyń túri belgili: aıaǵymda tarpyldaǵan kırzo etik, butymda jumys istegende kıip júrgen bylǵanysh kóne shalbar. Keýde jaǵym ádeıi kúnge kúıý úshin tyr jalańash. Al basymda bir kezdegi ádemi formasynan túk qalmaǵan, sap-sary bop qańsyǵan saban qalpaq. Basy kózim shań-topyraq. Betimde, jalańash denemde terdiń qap -qara taram-taram, izderi.

Túrim osy. Bir qolymda qańǵyrlaǵan bes shelek, ekinshi qolymda sabyn, ysqyryp óleń aıtyp, aǵashtyń qalyń arasynan ózen boıyna sopań etip, shyǵa keldim.

Álgi ara kishkene ǵana ashyq alań, baýyrlaryn kúnge qyzdyryp jaıylyp jatqan qoı tastar. Tastyń bireýiniń ústinde dál bet aldymda basyndaǵy oramalyn qolyna alyp, betin jelpigen, ózinen-ózi entikkem bir áıel otyr.

Kózderi baqyraıǵan, jaq súıekteri shyǵyńqy, eki beti solyńqy bul áıeldi tanıtyn sekildimin. Biraq dál kim ekenin jóppeldemede esime túsire almadym. Sonda da qalt tura qap:

— Esensiz be, — dep sálem berdim.

Áıel ernin bolar bolmas jybyr etkizdi. Maǵan adam emes, jabaıy ań kórgendeı birtúrli tikireıe qarap qalǵan.

— Iá, jeńgeı, bul jaqta qaıdan júrsiz?

— Júrmin, — dedi de, tanys jeńgeı meniń bas-aıaǵyma sholyp qarap aldy. Sodan soń avtomatsha atylyp sarnap sóılep jóneldi:

— O, qalyptaryn qursyn. Kúnderiń qurysyn búıtip kórgen. Bul degen ne sor, ne azap? Ne kún týdy bastaryńa!..

Men, shynymdy aıtsam, alǵashynda ne bolǵanyn túsinbeı, shoshyp daldym. Tek qalshıyp tyńdap turmyn.

— ...men - daǵy dacha degenge raqat eken desem. Ne jol sekildi joly joq. Álginde avtobýstyń ishinde jurt syǵyp, óltirip qoıa jazdady. Dacha dep, baıımyz dep júrgenderiń osy ma? Jetisken ekensińder. O, búıtken baılyqtaryń qurysyn!..

Sarnaýyq jeńgeı toqtaıtyn emes. Zyǵyrdany qaınap, kimge tıisýdi bilmeı otyrsa kerek. Qudaı sol kezde meni aıdap ákelip bergen. Meniń jaı ǵana júz tanys bireý ekenimde sharýasy joq, ol endi ýytty tilip tópep tóge jóneldi.

Sóz saryny álgideı.

Áıeldiń kim ekeni sap etip esime keldi. Mm, Omekeńnin jubaıy ǵoı. Baıaǵyda bir ret úıinde de bolǵam. Oblystyq mekemelerdiń bireýinde irileý kyzmet atqaratyn Omekeń bıyl anaý dóńniń ústinen dacha salýǵa ýchastok alǵan. Kóktemde azyn-aýlaq aǵashtar otyrǵyzyp, oqta-tekte demalys kúnderi kelip, shuqylap eńbek etken bolyp júretin.

Iá, sonyń áıeli. Birneshe ret kóshede de kórip, amandasyp ótetinmin. Sarnaýyq áıel sarnap áli sóılep jatyr:

— ...sen jasap aldy dep edi ǵoı, qaısy? Anaý ma? Baıyǵan túriń sol ma? Tuqymy qursyn búıtken baılyqtaryńnyń. Dacha, dacha degen soń kóreıin dep kelsem. Ne basynda kóleńkelep otyratyn úıi joq. Ne qasynda irgesinde aǵyp jatqan sýy joq, Qý taqyr. Jarty saǵat otyryp em, tóbemdi kún tesip, eńiske qaraı túsem dep, qýraıǵa shólkıimdi jyrtqyzyp... qursyn, qursyn! Kásipteriń osy bolsa, tuqymy qursyn! Qýdan kórset» nesin!..

Áıeldiń kókezý, aqymaq áıel ekenin men jańa túsindim, Sonda da bolsa dacha týrasyndaǵy onyń bátýasyz, ǵaıbat sózderine ózimshe toıtarys bergim kelip:

— Jeńgeı, siz dacha degendi múldem basqasha túsinedi ekensiz. Dacha degen ol baılyq tabatyn oryn emes. Úıdi de, joldy da ózderińiz jasamasańyz bireý jasap bere me?

Meni tyńdaıyn dep jatqan áıel joq, Maǵan sóz de beretin emes. Sóılegende jáne betiniń bulshyq etteri jybyrlap ketedi eken.

— ...myna túrińe qarashy. Sumdyq! Ne basyńa kún týdy? Neden qysyldyń sonshalyq? Jazýshy dep seni kim aıtady.

— Áı, jeńgeı, osyndaı demalysta bir kún kelip, taza aýada eńbek etip...

— Nemene qalanyń aýasyn bireý ýlap qoıyp pa? Taza aýa izdeseń onda tipti alysqa ket, İlege baryp balyq aýla. Kýrortqa bar. Tuqymy qursyn búıtken dachanyń...

Abıyr bolǵanda osy kezde dál qasymyzǵa tómen qaraı bos ketip bara jatqan bir taksı kele alar ma? Álgini kórip, sarnaýyq jeńgeı qolyn shoshań etkizip, ornynan ushyp túregeldi.

— Taksı! Taksı!

Taksı kilt toqtady. Sarnaýyq jeńgeı jińishke qısyq aıaqtarymen sýdyń ishindegi qoı tastardyń bireýinen bireýine qoryna qalt-qult sekirip ótti de, mashınanyń artqy oryndyǵyna otyryp, kete bardy.

Men onyń sońynan biraz qarap turdym. Omekeńdi oıyma aldym. Omekeń az sózdi dymkes adam. Únemi ishi aýyrǵandaı qabaǵy kirbıip, betindegi ájimin qoldan kóbeıtip, tyjyrynyp júredi. Ýchastok alǵaly men ol kisimen bir-eki ret kezdesip, sóılesken edim. Sonda Omekeń «bas aýrýym, gıpertonıam bar edi. Bul jaqsy boldy. Osy jumyspen shuǵyldanǵaly ózimdi táýir sezinemin» degen bolatyn.

Dál osy kúnnen keıin Omekeń dachaǵa kelmeıtin boldy. Kórinýdi qoıdy. Sirá, sarnaýyq jeńgeı oǵan dacha jaıly myqtap leksıa oqysa kerek. Otyrǵyzǵan aǵashtary sýǵarylyp kútilmegendikten qýrap, jerin aram shóp, qýraı basyp, qalyp qoıdy. Shaldyń azyn-aýlaq sińirgen eńbegi saq ketti.

---