InfoHub Logo

Halyqaralyq otbasy kúninde Satpaev qalasynda kezekte turǵan azamattarǵa jańa páter kiltteri tabys etildi. Jalpy aýdany 2000 sharshy metr bolatyn 30 páterlik bes qabatty jańa úı paıdalanýǵa berildi. Bul týraly Infohub.kz aqparat agenttigi habarlaıdy.

Saltanatty sharaǵa jergilikti atqarýshy organdardyń ókilderi, qala turǵyndary, qoǵam belsendileri jáne baspana kezegin kútken otbasylar qatysty. Vedomstvonyń málimetinshe, bul kún kóptegen jyldar boıy kútken mańyzdy oqıǵa boldy.

Aımaq basshysynyń sózi

Qonaqtardy quttyqtaǵan Ulytaý oblysynyń ákimi Dastan Ryspekov óńirdiń áleýmettik saıasatynda halyqty sapaly jáne qoljetimdi baspanamen qamtamasyz etýdiń mańyzdy baǵyt bolyp qala beretinin atap ótti. Onyń aıtýynsha, bul baǵyttaǵy jumystar júıeli túrde júrgizilip, aldaǵy ýaqytta da jalǵasady.

Turǵyn úı qurylysynyń qarqyny

«Oblys qurylǵannan beri paıdalanýǵa 365 myń sharshy metrge jýyq turǵyn úı berildi. Tek bıyldyń ózinde taǵy 100 myń sharshy metrdeı turǵyn úı qurylysyn aıaqtaý josparlanýda. Bul 800-den astam otbasyǵa óz baspanasyn alýǵa jáne turmys jaǵdaıyn jaqsartýǵa múmkindik beredi. Júrgizilip jatqan keshendi jumystardyń arqasynda bizdiń oblys bıylǵy jyldyń qańtar-naýryz aılarynyń qorytyndysy boıynsha respýblıkada qurylys kóleminiń ósý qarqyny boıynsha kóshbasshylar qataryna endi», - dedi óńir basshysy.

Jergilikti búdjet qarajatymen qatar, jeke seriktesterdiń ınvestısıalary men múmkindikteri de belsendi túrde tartylyp jatqany aıtyldy. Mundaı tásil turǵyn úı qurylysynyń qarqynyn jedeldetip, qoldanystaǵy turǵyn úı qoryn jańartýǵa jáne óńir turǵyndary úshin qolaıly jaǵdaılar jasaýǵa yqpal etedi.

Novoselderdiń qýanyshy

Óz kezeginde, jańa baspana ıeleri de qýanyshtarymen bólisti. Satpaev qalasynyń turǵyny Jaýhar Ahmetovanyń aıtýynsha, olardyń otbasy 16 jyl boıy óz úıin kútken. «Biz bul kúndi óte uzaq kúttik. Ulytaý oblysy qurylǵannan keıin kezektiń jyldam jyljyp, bizdiń de úmitimizdiń paıda bolǵanyn baıqadyq. Búgin bizdiń armanymyz aqyry oryndaldy. Bul búkil otbasy úshin úlken qýanysh. Oblys pen qala basshylyǵyna kórsetken qoldaýy úshin shyn júrekten alǵys aıtamyz», - dedi ol.

Jalpy ınfraqurylymdy damytý

Oblys ákimdigi óńirde turǵyn úı ınfraqurylymyn damytý jumystary birneshe baǵytta júrgizilip jatqanyn habarlady. Jańa kóppáterli úıler salýmen qatar, ınjenerlik jelilerdi jańartý, komýnaldyq ınfraqurylymdy jańǵyrtý jáne apatty jaǵdaıdaǵy turǵyn úılerdi aýystyrý jobalary júzege asyrylýda.

Vedomstvo esterine salatyny, sáýir aıynyń basynda Ulytaý oblysynyń delegasıasy Qytaı Halyq Respýblıkasyna barǵan bolatyn. Sol saparda Jezqazǵan, Satpaev jáne Qarajal qalalaryndaǵy turǵyn úı qoryn jańartýǵa jáne apatty úılerdiń ornyna jańa turǵyn úıler salýǵa baǵyttalǵan jalpy somasy 12,5 mıllıard teńge bolatyn kelisimderge qol jetkizildi.

Jalpy, ákimdiktiń aqparaty boıynsha, oblysta jyl saıyn turǵyn úı qurylysynyń kólemi artyp keledi. Mundaı jobalardy júzege asyrý halyqtyń ómir súrý sapasyn arttyrýǵa, áleýmettik turaqtylyqty nyǵaıtýǵa jáne óńirdiń odan ári damýy úshin qolaıly jaǵdaılar jasaýǵa yqpal etedi dep sendiredi vedomstvo.