InfoHub Logo

Semeı qalasynda qarjy pıramıdasynyń qurbany bolǵan júzdegen adam ádil sot sheshimin kútip otyr. Jalpy keltirilgen shyǵyn kólemi mıllıard teńgeden asyp jyǵylady. Qazirgi tańda 100-den astam adamdy jábirlenýshi retinde tanylyp, alty kúdiktige aıyp taǵyldy.

Bul týraly Infohub.kz aqparat agenttigi habarlaıdy.

Qarjy pıramıdasynyń qurbandary

Qala turǵyndarynyń biri aldaýǵa senip, óz úıiniń ornyna jarty jyldan beri jaldamaly páterde turyp jatqanyn aıtady. Onyń sózinshe, birneshe jyl buryn otbasy qarjy pıramıdasyn uıymdastyrýshylarǵa 15 mıllıon teńge bergen. Tanysynyń sendirýimen aqsha salǵan áıel, balalarymen birge keń úıli bolamyz dep úmittengen. Alaıda, qazir bes balasymen týystarynyń úıin panalap júr.

«Shynymdy aıtsam, bizdiń jaǵdaıymyzdy biletin, bes balam bar ekenin, erekshe qajettiligi bar balamyz bar ekenin bile tura adamnyń osylaı isteıtinin oılamadym. Sot isi ázirge alǵa baspaı jatyr. Ádil sheshim bolady dep úmittenemiz», - deıdi jábirlenýshi áıel.

200 mıllıon teńge joǵaltqan otbasy

İri somadaǵy aqshasyn salǵandardyń qatarynda kóp balaly áke de bar. Ol óziniń 200 mıllıon teńgege jýyq qarjysynan aıyrylǵanyn aıtady.

«Men «Rahat» JSHS-na eki júz mıllıon teńgege jýyq aqsha saldym. Bastapqyda az-azdan salǵanmen, keıin senim arttyryp, kóbirek saldyq. Biraq bizdiń senimimizdi paıdalandy. Endi aqshamyzdy qaıtaryp ala almaı otyrmyz», - deıdi er adam.

Zardap shekkenderdiń aıtýynsha, keıbir adamdar aqshasynan aıyrylǵan soń, ony kótere almaı qınalǵan. Kóbisi kólik, baspana satyp alyp, balalaryna jarqyn bolashaq syılaýdy armandaǵan. Biraq úmitteri aqtalmady. Semeıde resmı túrde 141 adam qarjy pıramıdasynan zardap shekkenin rastaǵan.

Tergeý derekteri

Tergeý málimetterine súıensek, aqsha tóleý jumystary qarjy pıramıdalaryna tán ádispen júrgizilgen: ıaǵnı, bir salymshynyń aqshasy ekinshisine aýdarylǵan.

«Jalpy keltirilgen shyǵyn mıllıard teńgeden asady. Bul somanyń 200 mıllıon teńgeden astamy ishinara óteldi. Qazirgi ýaqytta is sotta qaralýda», - dep málimdedi Abaı oblysy boıynsha ekonomıkalyq tergeý departamenti bastyǵynyń orynbasary Sáken Qondybaev.

Quqyq qorǵaý organdary azamattardy mundaı usynystarǵa abaı bolýǵa jáne olardy muqıat tekserýge shaqyrdy.