InfoHub Logo

Shahtınsk qalasyndaǵy bes qabatty turǵyn úıde gaz-aýa qospasynyń jarylysy boldy. Turmystyq gaz balonynyń jarylýy saldarynan segiz adam zardap shekti. Olardyń beseýi - turǵyndardyń shaqyrýyna kelgen polısıa qyzmetkerleri.

Bul týraly Infohub.kz aqparat agenttigi habarlaıdy.

Zardap shekkender medısınalyq mekemege jetkizildi. Qaraǵandy oblysy TJD-nyń 112 púltine bolǵan oqıǵa týraly habarlama polısıadan kelip túsken. Habarlama alǵannan keıin tórt mınýt ishinde TJM kúshteri men quraldary oqıǵa ornyna jetti. Kelgen kezde jıhaz ben turmystyq zattardyń janyp jatqany anyqtaldy.

Qutqarý jumystary

Órt sóndirýshiler joǵary qabattardan bes adamdy baspaldaq arqyly evakýasıalady. Pojarnıkter kelmeı turyp, polısıa qyzmetkerleri de turǵyndardy kóshirdi, qalǵandary óz betinshe ǵımarattan shyǵyp ketti.

Turǵyndardy jylytý úshin TJM vahtalyq kóligi paıdalanyldy. Sondaı-aq, jylytý pýnkti uıymdastyryldy.

Órttiń sebebi

TJM kúshterimen 40 sharshy metr aýmaqtaǵy órt tolyqtaı sóndirildi. Jarylystyń sebepteri men mán-jaıy anyqtalýda. Oqıǵa ornynda TJD bastyǵy bastaǵan órt sóndirý shtaby quryldy. Oqıǵa ornynda órt sóndirýshiler, TJM qutqarý toptary, sondaı-aq medısınalyq qyzmetter, polısıa jáne jergilikti atqarýshy organdardyń ókilderi bar.

Qaraǵandy oblysy PD baspasóz qyzmetiniń málimetinshe, bóten múlikti qasaqana joıýǵa ákep soqtyrǵan órt faktisi boıynsha qylmystyq is qozǵaldy.

Polısıa 40 jastaǵy kúdiktini ustady. Qazirgi ýaqytta ol Shahtınsk qalalyq aýrýhanasynyń arnaıy bóliminde emdelip jatyr jáne baqylaýda. Saýyqqannan keıin ýaqytsha ustaý ızolátoryna qamalatyn bolady. Qazirgi ýaqytta jan-jaqty jáne obektıvti tergeý júrgizilýde.