InfoHub Logo

Shákirtimniń erteńgi  jetistigi – meniń búgingi tálimimniń nátıjesi!

(Nur-Sultan qalasy №69 mektep-gımnazıasynyń qazaq tili men ádebıeti pániniń muǵalimi Jaqsylyq Juldyzaı Jumabergenqyzy)

"Bilim – parasatty, ol – bir aǵyn,

Shákirtke tógedi ylǵı jan shýaǵyn.

Ustaz dep qoǵam ár kez tanıtuǵyn,

Qasterli, qasıetti – ol muǵalim"

 Iá, árıne,ustaz urpaq tárbıelep ósirýshi, qoǵam sengen adam. Ustaz bolý ári baqyt, ári abyroı. Osy qasterli mamandyqtyń qadirin bilip, shákirtteriniń júregine asyl qasıetterin uıalatyp, ón boıyna ustazǵa tán salmaqtylyq pen mádenıettilikti syıǵyza bilgen jandardy halqymyz árqashanda erekshe qurmet tutqan.

Jahandaný zamanynda órkenıet kóshinen qalmaý úshin bilimdi, sanaly urpaq tárbıeleý mańyzdy. Ustaz táliminen nár alyp sýsyndaǵan shákirttiń jetistikke qol jetkizýi – bizdiń qoǵam úshin eń basty rýhanı qundylyqqa aparay sózsiz. Bilimmen qarýlanǵan tulǵa qoǵamdy damytýǵa óz úlesin qosatyny belgili. Qazirgi zaman talabyna saı ár balanyń qabiletine qaraı daryndylyǵyn damytý, bilim báıgesinde, dúbirli jarystarda  júzden júırik, myńnan tulpar shákirt shyǵarý – ustazdardyń eren eńbeginiń jemisi.

Joǵary oqý ornyn akademık M.Qozybaev atyndaǵy Soltústik Qazaqstan memlekettik ýnıversıtetin "qazaq tili men ádebıeti" páni muǵalimi boıynsha tamamdap shyqtym. Soltústiktiń qıyrynda ornalasqan Qyzyljar qalasy, Sábıt pen Ǵabıttaı tulǵalar týǵan óńir, poezıanyń paıǵambaryna aınalǵan Maǵjandaı uldy ósirgen jer maǵan da ustazdyq joldyń esigin aıqara ashty. Alda meni úlken jumystar men arnaýly mindetter kútip turdy. Shákirtterimniń erteńgi jetistigi meni qýantyp, eńbek jolymda bıikterden kóriný úshin ár sabaǵymda sapaly bilim berip, sanaly shákirt shyǵarýym tıis. Árıne, muǵalim úshin eń ǵajap nárse ózi bilim bergen shákirtteriniń jetistigin kórip tóbesi kókke jetse keremet emes pe?!

Bilimimdi shyńdap, armanymdy aldyǵa úmit etip oqýshylaryma  qazaq tiliniń qudirettiligin, ádebıetimizdiń qymbattylyǵyn boıyna darytý negizgi maqsatqa aınaldy.Abaıdyń asyl sózderin, Maǵjannyń jalyndy urandaryn, Muqaǵalıdiń altyndaı asyl óleńderin  shákirtterimniń júrekterine uıalatyp, bolashaqta elimizdiń eleýli, halqymyzdyń qalaýly urpaqtaryna aınaldyrý maǵan artylǵan mindet dep bilemin. Qazaq tiliniń qasterliligi sonsha onyń tym shyń bıikte turǵanyn oqýshyǵa  jetkizip, shákirtterim arqyly úmitimniń aqtalǵanyn dáleldeý. Bolashaq elin súıer, jerin súıer, ana tilin qasterleıtin, uly tulǵalarymyzdy qadirleıtin til janashyrlary menen tálim alyp shyqqan shákirtter bolatynyna senemin jáne osy maqsatqa jetý úshin shákirtterimdi sapaly bilim nárimen sýsyndatamyn.

«İsińizge, eńbegińizge, oqýyńyzǵa naǵyz adamgershilikpen kirisseńiz, sóz joq, jeńiske jetesiz» deıdi ǵoı ǵalym Qanysh Sátbaev. Óıtkeni eń aldymen óz pánińe degen zor súıispenshilik bolǵany abzal. Osynaý súıispenshilik oqýshy boıyndaǵy bilimge, pánge degen alǵashqy qushtarlyǵyn oıatady. Al osy shákirt boıynda oıanǵan bilim qushtarlyǵy endi tutanǵan shyraq sekildi. Eń qıyny – osynaý shyraqty sóndirip almaý. Ol úshin talmaı eńbektený men izdený qajet. Sonda ǵana ol bilim shyraǵy laýlaǵan jalynǵa aınalady.

Beıneti qatty, zeıneti tátti mamandyqty tańdap eńseli bilim ordasynda qyzmet kórsetý - meniń boryshym! Kún saıyn mektep qabyrǵasyna kirgen sátten aldymnan «Juldyzaı Jumabergenqyzy» dep júgirip shyǵatyn balapandarym meni eshqashan bul jolda jalyqtyrmaıdy.  Alladan berilgen úsh mamandyqtyń biri - ustazdyq jol! Al, endeshe, bizge artylar úmit te, júkteler mindet te áli alda! Ustazdyq jol men tańdaǵan jol!

---