InfoHub Logo

Qorqyttyń Jelmaıasy astynda, qara qobyzy qolynda únemi el aralap, adasqanǵa jón siltep, ańyrǵanǵa aqyl berip, sáýegeılik qurady eken. Tóńiregindegi kózi kórip, kóńili túskendi qobyzyna kúı etip qosyp, aldaǵyny qyryq jyl buryn boljaıtyn bolypty.

Kúnderdiń bir kúninde aq saqaly beline túsken, aq taıaǵy kók tiregen bir áýlıe Qorqytqa túsinde aıan beredi: «Ýa, Qorqyt, sen ólimdi aýzyńa almasań, saǵan esh ýaqytta ólim joq!» — deıdi. Qorqyt osy sózdi óńinde estigendeı bolyp oıanady da, «Táńiriniń bul da bir syny bolar» dep kókeıine túıip alady.

Sodan jyljyp jyldar, syrǵyp kúnder ótedi. Aq saqaldy, aq taıaqty áýlıeniń aıtqan ósıetin esten shyǵarmaı, ólim týraly sózdi aýzyna almaı, qobyzyn tartyp, el aralap júrip jatady.

Birde Jelmaıasynyń buıdasyn tartyp, bel jazyp otyrsa bir aýyldyń taıly-taıaǵy qalmaı jabylyp qashaǵan ógizdi qaıyra almaı júrgenin kóredi. Sol jerde Qorqyt Jelmaıasyna mine salyp, qashaǵan ógizdi qaıyryp bermek bolady. Biraq ógiz Qorqyttyń Jelmaıasyna da boı bermeıdi. Qýa-qýa ábden tıtyqtap sharshaıdy. Sonda Qorqyt: «Qap, saǵan ólsem de jetpeı qoımaspyn!» — dep Jelmaıasyn tebine túsedi.
Osy sózdi aıtýy muń eken tarǵyl tana tasqa aınalyp, qatyp qalady. Tasqa aınalar aldynda tarǵyl tanaǵa til bitip:

Meniń ózim qara edim,
Qaradan týǵan ala edim.
Týǵan jerim — Qazalym,
Myna taý boldy-aý ajalym! —
dep dóńbekshı yńyranǵan eken.

Sol jerde ólim týraly sózdiń aýzynan shyǵyp ketkenine Qorqyt qatty ókinip, muńǵa batady. Biraq bolar is boldy, endi taǵdyrdyń jazýynan qashyp qutylýdyń amalyn oılaıdy. Sóıtip, Jelmaıasyn jeldirip, dúnıeniń tórt buryshyn kezip ketedi.

Osy oqıǵa Qorqyttyń qobyzyna «Tarǵyl tana» degen kúı bolyp shalynǵan eken.

---