InfoHub Logo

Shalqar qalasynda 17 jastaǵy jasóspirimniń qaza bolýyna qatysty is boıynsha taǵy eki kúdikti ustaldy. Bul oqıǵa qoǵamda úlken rezonans týdyrdy.

Bul týraly Infohub.kz aqparat agenttigi habarlaıdy.

17 jastaǵy Álıhan Jánibek 20 naýryzǵa qaraǵan túni kámeletke tolmaǵandar arasyndaǵy toptyq janjal kezinde qaza tapty. Týystarynyń aıtýynsha, bul «aýdan-aýdan» arasyndaǵy tóbeles bolǵan. Jasóspirim keýdesinen pyshaq jaraqatyn alyp, oqıǵa ornynda kóz jumdy.

İs qozǵalyp, kúdiktiler anyqtaldy

Polısıa departamenti atalǵan fakti boıynsha qylmystyq is qozǵaǵanyn habarlady. Janjalǵa qatysqan barlyq tulǵalar anyqtalyp, polısıa bólimine jetkizildi. Olardyń áreketterine zań aıasynda quqyqtyq baǵa beriletin bolady.

Keıinirek kisi óltirý kúdigimen Shalqar qalasynyń 18 jastaǵy turǵyny ustaldy. Alaıda, 21 naýryzda marqumnyń ákesi Jánibek Álımanov oblys ákimine, prokýrorǵa jáne polısıa departamentiniń basshysyna júginip, janjalǵa eki taraptan 14–15 jasóspirim qatysqanyn, biraq tek bir adam ǵana ustalǵanyn aıtty. Ol qalǵan qatysýshylardyń áreketterine de quqyqtyq baǵa berýdi jáne isti jan-jaqty tergeýdi talap etti.

Tergeý jalǵasýda

26 naýryzda polısıa departamenti istiń QR Qylmystyq kodeksiniń «kisi óltirý» jáne «toppen jasalǵan buzaqylyq» baptary boıynsha tergelip jatqanyn málimdedi. Qazirgi ýaqytta úsh kúdikti ýaqytsha ustaý ızolátoryna qamaldy. Sonymen qatar, oqıǵanyń kýágerleri men basqa da qatysýshylar anyqtalǵan.

Qylmysty tergeý úshin tájirıbeli tergeýshiler men jedel qyzmetkerlerden arnaıy jedel-tergeý toby quryldy. İs oblystyq polısıa departamentiniń qaraýyna berilip, tergeý barysy basshylyqtyń erekshe baqylaýyna alyndy.

Shalqardaǵy jasóspirimniń ólimi qoǵamda alańdaýshylyq týǵyzdy. Quqyq qorǵaý organdary barlyq kináliler zań aldynda jaýap beretinin málimdedi.