InfoHub Logo

Sharyn shatqaly… Alyp ańǵarlar. Qyzǵylt qamaldar. Mystan saılar. Jalmaýyz kempir ózegi… Osy bir aıryqsha oryn týraly aıtylatyn ańyz kóp. Aqıqatyn eshkim arshyp ala almasy taǵy belgili. Óıtkeni Sharyn kanony myna jer betine pende balasynyń tabany tımeı turyp, mıllıon jyldar buryn paıda bolǵan. Óıtkeni ker dalanyń tósinen adam balasy myń jyldap kertise de, dál osyndaı ǵajapqa toly álemdi jasaýlary múmkin emes, oǵan tek bólekshe kúsh, mıllıondaǵan jyl ýaqyt qajet. Sharynǵa baryp, óz kózimen kórgen jan onyń keremetin anyq túsinedi, ertegiler elinde, ıakı bir erte zamanda qıraǵan alyp qaǵanattyń ornynda turǵandaı kúı keshetini ras. Nege deısiz ǵoı…

Jeti ıirimdi sýy bar áıgili Jetisýdyń orta bóliginde myńjyldyqtar jumbaǵyn ishine búgip dańqy alysty sharlaǵan Sharyn jatyr. Almatydan 200 shaqyrymdyq jerde, Narynqol men Kegenniń etegin basyp, Shyǵysqa bet túzegen kerýen joldardan sál qıys shette ornalasqan bul ózgeshe órnekti meken týraly adam balasynyń bilgenine kóp bola qoıǵan joq. Joq, qatelesip turmyz, ózgeler bul sulý mekendi kórmegenimen, bizdiń babalarymyz san alapat ǵasyrlardan beri osy taýlardyń qoınaýynda ómir súrip, tylsymy kóp mekenge tańyrqaýmen keledi. Áýel deseńiz, sonaý qola dáýirinen buryn-aq osyndaǵy quzdardyń basyna, tastardyń, ýaqyt mújip bitirgen, totyqtyrǵan qyzǵylt kerish topyraqtardyń betine – ejelgi adamdar, bálkim, prototúrkiler, baǵzy kóshpendiler shyǵar, túrli-tústi sýretter syzǵanyn kórer bolsańyz, oıyńyzdyń on saqqa keteri sózsiz. Bahadúr babalarymyz ne jazdy eken? Ne syzdy eken? Qyzyqsańyz, solaı tartyńyz!

"Turan" ýnıversıtetiniń 3 kýrs stýdenti Elrıza Baýyrjanqyzy

---