InfoHub Logo

Berik bolsyn baýlary balańyzdyń,
Baspaı ótsin bireýdiń ala jibin.
Ata-anaǵa qolǵabys tıgizetin,
Darysa eken boıyna sanaly uǵym.

Kún men apta aılar bop óse bersin,
Deni saý bop, kúshteri eselesin.
Ata-ananyń tilegi qabyl bolyp,
Qydyr Ata ońdasyn peshenesin.

Kúshti bolsyn Ata-ana densaýlyǵyń,
Kelip jetti tilegen ańsar kúniń.
Bala degen adamnyń baýyr eti,
Qýanyshqyp barlyǵyń án sal búgin.

Qalja soıyp jasaldy shildehana,
At qoıyldy shaqyryp tańnan taza.
Eseıgende eline qorǵan bolyp,
El senimin aqtasyn osy bala
Ámın, Allahý Ákbar!

*** *** *** ***

Sábı keldi ómirge,
Sábı keldi!
Bir kúı kernep, shalqytty án irgemdi.
Anasy aman bosandy, qalja jesin,
At ustaıtyn azamat bar úıde endi.

Sábı keldi shyr etip, dúrliktirip,
Óziniń kim ekenin turdy uqtyryp.
«Súıinshi» - dep
Shapqylap bara jatyr,
İnishegim taıyna yrǵyp minip.

Toı bastaldy tolaıym –
Shildehana,
Bala baqyt,
Meıli ul, qyz bolsa da,
Aǵaıyn aınalaǵa at shaptyryp,
Qýansyn «Súıinshi» dep júz bosaǵa.

Shildehana qosady oı-tilekti,
Baýy berik bolsyn, dep
Toıshy kepti!
Ómirge taǵy da bir qazaq týyp,
Sanany saltanatpen serpip ótti.

Shildehana – uly toı, jan ushqyny,
Jelkildedi aýyldyń namys týy.
Jigit bolar erteń-aq,
Aman bolsyn,
Kóringen taýdyń bar ma alystyǵy!?
Áýmın

*** *** *** ***

Kótereıik bilekti,
Nurǵa bólep júrekti.
Bóbekke bata bereıik,
Aǵynan aıtyp tilekti:
Sábıimiz súıkimdi bolsyn,
Óner-bilimge ıkemdi bolsyn,
Báıterekteı boıshańdanyp,
Óren, órshil, órkendi bolsyn!
Jaqsy joldy tańdasyn,
Jamandyq tálim almasyn!
Danalardyń dástúrin,
Jańalasyn, jalǵasyn,
Shuǵylaly shýaqty kún keshsin,
Basyn sur bult shalmasyn,
Qos topshysy talmasyn,
Qyrandaı bıik samǵasyn!

*** *** *** ***

Bir úıdiń balasy bolma,
Búkil eldiń sanasy bol!
Bir eldiń balasy bolma,
Bar eldiń danasy bol!
Bir tonnyń jaǵasy bolma,
Kóp qoldyń aǵasy bol!
Aqty aq dep baǵala,
Qarany qara dep qarala!
Ózegiń tolsa, eldiń ishin arala.
Basyńa is tússe, kópshilikti saǵala.
 
Ózińe-óziń kámil bol,
Halqyńa ádil bol!
Jaýyńa qatal bol,
Dosyńa adal bol!

*** *** *** ***

Alaman bolyp er jetsin,
Aqsaqal bolyp tórletsin!
Qas batyrdaı kórikti,
Ǵumyry bolsyn berikti!
Azamat bolsyn arýaqty,
Minezi bolsyn salmaqty.
Óneri bolsyn jan-jaqty,
Osy aıtqannyń bári qabyl bolyp,
Allah Taǵala bersin zor baqty!

*** *** *** ***

Anasynyń aıaýly
Jaryp shyqqan kemerin,
Qadam basyp ómirge,
Jas shybyqtaı búr jaryp,
Jańa jaıǵan jeligin,
Torsyq sheke, aq mańdaı,
Óse bersin bóbegiń.
Ómiri uzaq bolsyn dep,
Kóńili nurǵa tolsyn dep,
Aq batamdy beremin.
Azamat bop er jetsin,
Qıyn kezde joldastan
Aıamaıtyn kómegin.
Toıyń toıǵa ulassyn,
Bola bersin degeniń!
Allahý aqpar!

*** *** *** ***

Artyq bolyp nesibiń,
Dastarhanyń jaıylyp,
Ashyq bolsyn esigiń,
Óre bersin balalar,
Dushpandaryń bolmasyn,
Kúnshildikpen tabalar.
Alpamystaı taǵy da,
Ul artynan ul tapqyn.
Jarqyraǵan Sholpandaı,
Qyz artynan qyz tapqyn
Qutty bolsyn búgingi,
Shildehana toılaryń.
Tilekteriń qabyl bop,
Oryndalsyn oılaryń.
Áýmın

*** *** *** ***

 

---