InfoHub Logo

Uly Otan soǵysy aıaqtalǵan soń, Baýyrjan Momyshuly Bishkek qalasyna áskerı qyzmetke jiberiledi. Ol jolshybaı óziniń týǵan jeri — Jýaly aýdanynda (Jambyl oblysy) 4-5 kún aıaldaıdy. Batyr aǵamyzdyń janyna oblystyń, aýdannyń biraz basshy qyzmetkerleri erip júredi. Aýyl aqsaqaldarymen birge jaqsy sózge jany qumar jastar da Baýkeńniń áńgimesin tyńdaıdy.

Saparynyń sońǵy kúni Baýkeń jalǵyz balasy soǵysta qaza bolǵan qasiretti qarıanyń biriniń úıinen dám-tuz tatyp shyqpaqshy bolady. Qansha úıdiń dámin tatsa da, astan keıingi bata berýdi aýyl aǵalary atqarady. Endi elden attanar aldyndaǵy dám-tuzdyń batasyn berýdi jurt Baýkeńnen ótinedi. Baýkeń sál oılanady da, tebirene túsip, bylaısha termelep ketedi:

E, Jaratýshy jasaǵan!
Tilegimizdi qabyl et,
Imanymyzdy qabyl et,
Dozaqtaǵy ottan saqta,
Qańǵyrǵan oqtan saqta,
Paraqor sottan saqta.
(Jurt sotqa qarap kúledi).
Kirli sýmen jýystan saqta,
Yntymaqsyz týystan saqta.
Qara júrek batyldan saqta,
Dáıeksiz til taqyldan saqta.
Adaldyqty arbaǵannan aqynnan saqta,
Ashý jeńgen aqyldan saqta,
Qaıyrymsyz jaqynnan saqta.
Qate isine qınalmas,
Kók doly qatynnan saqta.
Halyqty zábirler bastyqtan saqta.
Jaqynǵa jala jabatyn
Qanquıly qastyqtan saqta.
Syrty sulý, ishi kir,
Qadir bilmes pasyqtan saqta.
Óz pikiri tatymsyz,
Kisi aqylymen kún kórer,
Tatymy joq jasyqtan saqta.
Nesibe keser kesirden saqta,
Joly las jesirden saqta.
Keýdesin kergen kelinnen saqta,
Mezgilsiz kelgen ólimnen saqta.
Jalqaý bala namyssyz,
Ojdany joq uldan saqta.
Túnere atqan tańnan saqta,
Jańbyry joq shańnan saqta.
Ákiminde shapaǵat joq,
Ádildikte sharapat joq,
Moldasynda sharıǵat joq,
Baılarynda salaýat joq,
Kedeıinde qanaǵat joq,
Úlkeninde ulaǵat joq,
Kishisinde ınabat joq,
Azamatynda ar-uıat joq,
Kórshisinde qoshemet joq,
Qarıasynda bata joq,
Sózderinde pátýa joq,
Qur aıqaı, shat-shálekeı dańnan saqta.
E, Jartýshy jasaǵan!
Ómir berseń – jaılyǵyn ber,
Dáýleti men baılyǵyn ber.
Eńbegimiz ónisti bolsyn,
Qambamyz jemisti bolsyn.
Kósegemiz kórkeıip,
Myńǵyrǵan mal óriske tolsyn.
Qarıany kemel, sypaıy ǵyp ber,
Aǵalardy raıly ǵyp ber,
Apalardy meıirli ǵyp ber,
Jezdelerdi zeıindi ǵyp ber,
Qudaǵıdy keń peıildi ǵyp ber,
Qaryndasty kórikti ǵyp ber,
İnilerdi bórikti ǵyp ber.
Áıeldi aq nekeli ǵyp ber,
Balany qany tolyq shekeli ǵyp ber.
Jıenderdi jeteli ǵyp ber,
Kúıeýlerdi kósheli ǵyp ber,
Eki aıtpaıtyn eseli ǵyp ber,
Kelinderdi kelisti ǵyp ber.
Qyzdardy baqytymen
Urpaǵy kóp óristi ǵyp ber.
Attardy jelisti ǵyp ber,
Aǵashtardy jemisti ǵyp ber,
Tóskeıde tól kóbeısin.
Jaıqaltyp dala egisti ǵyp ber,
Dáni tolyq ónisti ǵyp ber.
Urpaqtardy namysty ǵyp ber,
Tulpardy tabysty ǵyp ber.
Jomart bolsań, Jasaǵan!
Aıtqanymnyń barlyǵyn,
Aǵaıyndy aqaýsyz
Ónegeli ómirmen tatý-tátti,
Tabysty ǵyp ber!

---