InfoHub Logo

Shymkentte tegin júzý seksıasyna jazylýǵa ata-analar arasynda úlken suranys týdy. Jastar saraıynyń aldyna tirkeý bastalmaı jatyp, tún ortasynan beri kezekke turǵan jurtshylyq jınaldy. Alaıda, bólingen oryndar sany shekteýli bolyp shyqty.

Bul týraly Infohub.kz aqparat agenttigi habarlaıdy.

Ata-analardyń narazylyǵy

Kóptegen ata-analar birneshe jyldan beri balalaryn júzý úıirmesine bere almaı júrgenderin aıtyp shaǵymdandy. Keıbir ata-analar tańǵy saǵat 8:30-da kelse de, 143-orynda turǵanyn aıtty. Resmı tirkeý saǵat 10-da bastalýy kerek bolǵan.

«Eger aqshamyz jetkende, biz mundaı qıyndyqqa tap bolmas edik. Barlyǵy balalaryn tegin oqytqysy keledi», - deıdi jergilikti turǵyn Úlmeken Bımýsaeva.

Taǵy bir turǵyn Úljan Qonysova: «Túngi saǵat úshte adamdar uıyqtaýy kerek. Biz tańerteń keldik, biraq 200-den astam adam jınalǵan. Bul jaǵdaıdy retteý kerek. Ár joly osylaı bolady. Biz orta ǵasyrda ómir súrmeımiz ǵoı», - dep ashýlandy.

Ákimshiliktiń jaýaby

Mekeme ákimshiliginiń málimetinshe, baseınge jazylý aı saıyn júrgiziledi. Qazirgi tańda tek 50 oryn ashyq. Oryndar sabaqqa qatyspaıtyn nemese sebepsiz jiberetin balalardyń esebinen bosaıdy. Sondyqtan tek tolyq qujattary bar 50 adam qabyldanady.

«Ata-analar nege onlaın tirkeýge bolmaıtynyn suraıdy. Buryn onlaın tirkeý bolǵan. Biraq 2026 jyldan bastap platforma aýysqandyqtan, ata-analar jeke kelýi kerek. Bizde «Mındal» platformasy qoldanylady. Baseın rezeńke emes, myń balany birdeı qabyldaı almaımyz. Ár topta 15 adamnan artyq bolmaıdy. Gıgıena talaptary da bar», - dep túsindirdi ádistemelik bólim meńgerýshisi Aqmaral Júnisova.

Onyń aıtýynsha, baseın myń balany qabyldaı alady, onyń ishinde 100-den astamy erekshe qajettilikteri bar balalar. Sondyqtan ár balaǵa jeke oqý kestesi jasalǵan.