InfoHub Logo

Shymkenttegi Jastar saraıynda tegin júzý seksıasyna jazylýǵa degen suranys ata-analar arasynda kútpegen tolqý týdyrdy. Tirkeý bastalmaı turyp, tún ortasynan bastap júzdegen adam jınaldy, biraq usynylǵan oryndar sany tym shekteýli bolyp shyqty.

Ata-analardyń narazylyǵy

Kóptegen ata-analar jyldar boıy balalaryn júzý úıirmesine bere almaı júrgenderin aıtyp shaǵymdandy. Keıbir ata-analar tańǵy saǵat 8:30-da kelse de, tirkeý kezeginde 143-shi bolyp turǵanyn habarlady. Resmı tirkeý saǵat 10-da bastalýy kerek bolǵan.

«Eger bizde aqsha jetkilikti bolsa, mundaı qıyndyqqa tap bolmas edik. Barlyǵy balalaryn tegin oqytqysy keledi», - dep bólisti jergilikti turǵyn Úlmeken Bımýsaeva.

Taǵy bir turǵyn Úljan Qonysova narazylyǵyn bildirdi: «Túngi saǵat úshte adamdar uıyqtaýy kerek. Biz tańerteń keldik, biraq 200-den astam adam jınalǵan. Bul jaǵdaıdy retteý qajet. Ár joly osylaı bolady. Biz orta ǵasyrda ómir súrmeımiz ǵoı», - dedi ol.

Ákimshiliktiń jaýaby

Jastar saraıy ákimshiliginiń málimetinshe, baseınge jazylý aı saıyn júrgiziledi. Qazirgi tańda tek 50 oryn bos. Bul oryndar sabaqqa qatyspaıtyn nemese sebepsiz jiberetin balalardyń esebinen bosaıdy. Sondyqtan tek tolyq qujattary bar 50 adam ǵana qabyldanady.

«Ata-analar nege onlaın tirkeýge bolmaıtynyn suraıdy. Buryn onlaın tirkeý bolǵan. Biraq 2026 jyldan bastap platforma aýysqandyqtan, ata-analar jeke kelýi kerek. Bizde «Mındal» platformasy qoldanylady. Baseın rezeńke emes, myń balany birdeı qabyldaı almaımyz. Ár topta 15 adamnan artyq bolmaıdy. Gıgıena talaptary da bar», - dep túsindirdi ádistemelik bólim meńgerýshisi Aqmaral Júnisova.

Onyń aıtýynsha, baseın jalpy alǵanda myń balany qabyldaı alady, onyń ishinde 100-den astamy erekshe qajettilikteri bar balalar. Sondyqtan ár balaǵa jeke oqý kestesi jasalǵan.

Bul týraly Infohub.kz aqparat agenttigi habarlaıdy.