InfoHub Logo

Shyǵys Qazaqstan oblysyndaǵy sot ǵalymdy kúnbaǵys gıbrıdine berilgen patenttiń avtorlary qatarynan shyǵarý týraly talapty qanaǵattandyrmady. Sot, ǵalymnyń seleksıalyq jumystaǵy úlesin shyǵarmashylyq jáne ǵylymı-zertteý qyzmet retinde tanyp, onyń patenttegi avtorlyq quqyǵyn qorǵap qaldy.

Bul týraly Infohub.kz aqparat agenttigi habarlaıdy.

Patenttiń ózi bir seriktestikke berilgenimen, qujatta gıbrıdti ǵylymı qyzmetkerler ujymy jasaǵany kórsetilgen. Keıinnen, patent ıesi sotqa júginip, bir avtordy tizimnen shyǵarýdy talap etken. Sebebi retinde, atalǵan qyzmetkerdiń tek laýazymdyq mindetteri aıasynda tehnıkalyq jumystar atqarǵanyn, gıbrıdti jasaýǵa avtor retinde qatyspaǵanyn alǵa tartqan.

Sottyń sheshimi

İsti qaraý barysynda Glýbokov aýdandyq soty tıisti laýazymdyq nusqaýlyqtardy, ǵylymı hattamalardy, zertteý esepterin zerdelep, kýágerlerdi tyńdady. Sondaı-aq, ósimdik sharýashylyǵy salasyndaǵy mamandardyń qorytyndylary da eskerildi.

Sot materıaldarynda kórsetilgendeı, seleksıalyq proses – bul bastapqy jáne ata-analyq jelilermen jumys isteýdi, býdandastyrý kombınasıalaryn ázirleýdi, synaqtar júrgizýdi jáne nátıjelerdi taldaýdy qamtıtyn úzdiksiz ǵylymı-zertteý qyzmet bolyp tabylady.

Sot ǵalymnyń arnaıy bilimi bar ekenin, seleksıa salasynda uzaq jyldyq tájirıbesi bar ekenin jáne aǵa ǵylymı qyzmetker laýazymyn qosa atqarǵanyn anyqtady. Onyń patent avtorlarynyń qataryna engizilýi buǵan deıin ǵylymı organnyń sheshimimen, qatysý úlesi belgilenip resimdelgen.

«Jaýapkerdiń seleksıalyq proseske qatysýy ǵylymı-zertteý jáne shyǵarmashylyq sıpatta boldy, sondyqtan ony patent avtorlarynyń qatarynan shyǵarýǵa negiz joq», - delingen sot sheshiminde.

Sot sheshimi zańdy kúshine endi. Talap aryz qanaǵattandyrýsyz qaldyryldy. Apelásıalyq saty – Shyǵys Qazaqstan oblystyq soty – bul sheshimdi ózgerissiz qaldyrdy.