InfoHub Logo

Atyraý oblysynyń mamandandyrylǵan aýdanaralyq qylmystyq ister jónindegi sotynda Muqanǵalıevter otbasynyń birneshe múshesin óltirdi dep aıyptalǵan Sultan Sársemálıevke qatysty sot prosesinde tyń derekter aıtyldy.

Bul týraly Infohub.kz aqparat agenttigi habarlaıdy.

Tergeý materıaldaryna sáıkes, kúdikti qylmystan keıin marqumdardyń múlkin ıemdenip, sol qarjyǵa shetelge qashqan. İs qujattarynda joǵalǵan otbasy músheleriniń balalary biraz ýaqyt Sultan Sársemálıevtiń anasynyń qaraýynda bolǵany da kórsetilgen.

Shetelge qashý jospary

Quqyq qorǵaý organdary izdestirý jumystaryn bastaǵanyn túsingen kúdikti Atyraýdan shuǵyl ketýge sheshim qabyldaǵan. Tergeý málimetinshe, onymen birge Aqbaıan Muqanǵalıeva da elden ketken. Aıyptaý aktisinde Sársemálıevtiń ony Qazaqstanda qaldyrý qaýipti dep sanaǵany aıtylǵan.

Qylmystyq is materıaldaryna sáıkes, 2025 jyldyń 9 jeltoqsanynda Sársemálıev pen Muqanǵalıeva «Qaplanbek» ótkizý beketi arqyly Ózbekstanǵa ótken. Odan ári Tashkent – Kýala-Lýmpýr – Balı baǵytymen ushyp, Indonezıanyń Balı aralyna jetken.

Balıdegi ustalý

Olar Indonezıada eki aıdan astam ýaqyt boıy jasyrynyp júrgen. Alaıda 2026 jyldyń 24 aqpanynda Indonezıanyń kóshi-qon qyzmeti vızalyq rejımdi buzǵany úshin ekeýin de ustaǵan. Keıin kúdiktiler Qazaqstanǵa deportasıalanǵan.

Tergeý barysynda 2026 jyldyń 9 naýryzynda Sultan Sársemálıevtiń qatysýymen júrgizilgen tekserý kezinde Munaıshy yqshamaýdanyndaǵy úı aýlasynan Muqanǵalıeva men Qarabalınniń jerlengen máıitteri tabylǵan.

Aıta keteıik, tórt adamdy óltirdi dep aıyptalǵan Sultan Sársemálıevke qatysty aldyn ala sot tyńdaýy 18 mamyrda bastaldy. Sot barysynda ol óz kinásin moıyndap, ólim jazasyna da daıyn ekenin málimdegen.