InfoHub Logo

Qazaqstannyń Avıasıalyq ákimshiliginiń (QAÁ) jańa bas dırektory Maıkl Denıel elimizdiń áýejaılaryna jasaǵan saparynan alǵan áserlerimen bólisti. Ol keıbir áýejaılardy AQSH-taǵymen salystyryp, Qazaqstannyń basymdyǵyn atap ótti.

Bul týraly Infohub.kz aqparat agenttigi habarlaıdy.

Áýejaılardyń jaı-kúıi

QAÁ málimetinshe, Qazaqstanda 104 áýe kemesiniń eksplýatanty jumys isteıdi. Elde 973 áýe kemesi tirkelgen. Sondaı-aq, 25 áýejaı, 28 áýe kemesine tehnıkalyq qyzmet kórsetý jáne jóndeý uıymy, 21 avıasıalyq oqý ortalyǵy sertıfıkattalǵan.

AQSH-tan artyqshylyǵy

«Jeke tájirıbemdi bóliskim keledi. Túrkistan men Shymkent áýejaılaryna barǵanda jolaýshylarǵa kórsetiletin qyzmettiń sapasy meni qatty tań qaldyrdy. Meniń oıymsha, bul eki áýejaı da Amerıka Qurama Shtattaryndaǵy osyndaı kólemdegi áýejaılardyń standarttaryna saı nemese olardan asyp túsedi», - dedi Maıkl Denıel úkimet otyrysynda.

Áýejaı mańyndaǵy problemalar

Bas dırektor qazaqstandyq áýejaılarda áli de bar keıbir problemalardy da atap ótti. Sonyń biri – áýejaı mańyndaǵy qoqys polıgondary.

«Atyraý, Semeı, Óskemen, Kókshetaý, Balqash jáne Úrjar áýejaılarynyń mańynda ornalasqan qoqys polıgondary áýe kemeleriniń qustarmen soqtyǵysý qaýpin arttyrady jáne avıakompanıalar úshin paıdalaný shekteýlerin týdyrady. 2025 jyly áýe kemeleriniń qustarmen 280 ret soqtyǵysýy tirkelse, bıylǵy birinshi toqsanda bul kórsetkish 33-ke jetti», - dedi QAÁ basshysy.

Onyń aıtýynsha, Atyraý áýejaıy mańyndaǵy qoqys polıgony qustardy tartady jáne ushý qaýipsizdigine qater tóndiredi.

«Ekinshi másele – áýejaılar aýdanyndaǵy kedergilerdiń kóbeıýi jáne jerdi maqsatsyz paıdalaný. Almaty áýejaıynyń mańaıyndaǵy aýmaqta 160-qa jýyq kedergi anyqtalsa, Shymkent áýejaıy aýdanynda 150-den astam kedergi bar», - dep qosty Denıel.

Sheshim joldary

Bul problemalardy sheshý úshin QAÁ áýejaı mańyndaǵy aýmaqtardy aımaqtaý josparlaryn ázirlep, ákimdikterge joldaǵan. Alaıda, kóp jaǵdaıda bul josparlar eldi mekenderdi damytýdyń bas josparlaryna engizilmegen, bul áýejaılar mańynda jańa nysandar men kedergilerdiń paıda bolýyna sebep bolyp otyr.

«Ákimdiktermen ózara is-qımyldy kúsheıtý qajet, bul óz kezeginde ushý qaýipsizdigin jáne áýejaılardyń turaqty damýyn qamtamasyz etýdiń mańyzdy sharty bolyp qala beredi», - dep málimdedi Maıkl Denıel.

Tekserýler men sharalar

Avıasıa ákimshiligi basshysynyń aıtýynsha, 2025 jyly jáne 2026 jyldyń birinshi toqsanynda olar azamattyq avıasıa salasy sýbektilerine 1 202 tekserý júrgizgen. 7 avıakompanıaǵa qatysty eksplýatant sertıfıkattaryn toqtata turý nemese keri qaıtaryp alý sharalary qoldanylǵan. Sondaı-aq, 4 avıasıalyq oqý ortalyǵynyń qyzmeti men 2 áýe kemesine tehnıkalyq qyzmet kórsetý jáne jóndeý uıymynyń sertıfıkattarynyń qoldanysy toqtatylǵan. Buǵan qosa, 8 aerodromǵa qatysty 15 shekteý engizilgen.

Eske sala keteıik, Maıkl Denıeldi Qazaqstannyń Avıasıalyq ákimshiliginiń basshysy qylyp bıyl 4 mamyrda taǵaıyndaǵan bolatyn. Ol avıasıa salasynda arnaıy bilimi bar, Embrı-Rıddl atyndaǵy Aeroǵarysh ýnıversıtetin (AQSH) «aeronavtıka» mamandyǵy boıynsha bitirgen. Onyń azamattyq avıasıa salasynda 40 jyldan astam tájirıbesi bar. Azamattyq avıasıa komıteti habarlaǵandaı, jańa basshynyń negizgi mindetteriniń biri Qazaqstannan AQSH-qa tikeleı reıster ashý bolmaq.