InfoHub Logo

Baıaǵyda aǵash shabýmen aınalysatyn eki adam bolǵan eken. Kásipteri kúnde ormanǵa baryp aǵash shabý bolypty. Birinshi kisi kún shyǵýymen aǵash shabýdy bastap, kún batqansha tynbaıdy eken. Tipti tynyǵyp alý, tamaqtanýǵa da onshalyqty ýaqyt bólmeı tek aǵash shabady eken. Ekinshisi kúndegi ýaqytynda kelip, qajet kezinde tynyǵyp, túski ýaqytta asyqpaı tamaqtanyp, jumys isteıdi jáne úıine erte qaıtady eken. Áıtse de birinshi kisiniń tynbaı shapqan aǵashtarynyń kólemi ekinshisi kisiniń shapqanynan az shyǵady eken. Bir kúni álgi birinshi otynshy kelip: «Osy sizdiń asyqpaı, az ýaqytta istegen jumysyńyz, meniń erte kelip kesh qaıtyp, tynbaı istegen jumysymnan asyp túsedi. Munyń syry nede?» dep suraǵan eken. Sonda ol: «Munyń eshqandaı syry joq. Men jumys arasynda tynyǵyp otyryp, baltamdy qaırap alamyn, ótkir baltamen jumys tezirek bitedi, ári sharshamaısyń. Al sen ótpes baltamen ózińdi de, baltany da sharshatasyń, ári ýaqyt joǵaltasyń» degen eken. 

Kásipkerlik sabaqtarynda batyl bolý, jigerli, tabandy bolý jetistik kiltteriniń biri ekendigi kóp aıtylady. Mundaǵy birinshi adam eńbekqor, tabandy bolǵanymen, baltasyn qaıramaǵandyqtan jumysynyń ónimdiligi az boldy. Bul mysaldan tabandy bolýmen qatar, sol tabandylyqty aqyl-oımen basqarý, árbir kedergi men máselelerden sabaq alý, analız jasaý, sheshimin tabý, qysqasy ózińdi jetildirý qajettigin kórýge bolady. Demek ár adam óz salasynda tabandylyq tanytýmen qatar ózin jetildire tússe, qural-jabdyǵyn da zaman aǵymyna saı shyńdaı bilse, talaı asýlardy baǵyndyrary anyq.    

---