InfoHub Logo

Taksı júrgizýshileriniń endi taksoparkke tirkelmeı-aq, óz betinshe jumys isteýine zań aıasynda múmkindik berilýi múmkin. Bul týraly Májilis depýtattarynyń saýalyna jaýap bergen Premer-Mınıstrdiń orynbasary Roman Sklár málimdedi.

Sklárdyń aıtýynsha, qazirgi tańda Yandex Go, Uber, Glovo, InDrive sıaqty sıfrlyq platformalar azamattarǵa ıkemdi jumyspen qamtylý múmkindigin usynyp otyr. Bul servıster naryqtaǵy básekelestik pen jeke kásipkerliktiń damýyna serpin bergen. Máselen, «Iandeks.Taksı Korp» JSHS – taksı qyzmetine arnalǵan aqparattyq-dıspecherlik júıeler naryǵynda turaqty orynǵa ıe iri operatorlardyń biri.

Kompanıa jolaýshy tasymalyna baılanysty komısıany tarıf túrine (ekonom, komfort, bıznes, qalaaralyq jáne t.b.) jáne qyzmet kórsetiletin eldi mekendegi suranys deńgeıine qaraı ustaıdy. Alaıda júrgizýshilerdiń tabysyna túsetin salmaqty azaıtý maqsatynda, Antımonopolıalyq agenttik pen «Iandeks» kompanıasy arasynda komplaens kelisim jasalǵan.

Sklár ne deıdi:

— Bazalyq tarıften eki ese joǵary bolsa, kompanıa artyq somadan komısıa ustamaıdy. Iaǵnı bul aqsha tolyq júrgizýshiniń tabysy retinde qalady. Bul – júrgizýshilerdiń tabysyn ádiletti etýge baǵyttalǵan mańyzdy qadam, – delingen vıse-premerdiń jaýabynda.

Qazir bul salada jańa zańnamalyq ózgerister ázirlenip jatyr. Eger ózgeris qabyldansa, taksı júrgizýshileri taksoparkke táýeldi bolmaı, tikeleı platformalarmen jumys isteı alady. Bul kóleńkeli ekonomıkamen kúresip, salyqtyq ashyqtyqty arttyrýǵa yqpal etpek.