Mıllettiń kel maıdanǵa, talıptary,
Derti bar, dármeni joq, ǵaryptary!
Oqyǵan jastarynyń arqasynda
Kóz ashty kórshi jurttyń halyqtary.

Kórdiń be mılletińdi uıqy basqan?
Tebirenbeı jer qozǵalyp, jarylsa aspan
Oılaıyq bárimiz de mıllet qamyn,
Birigip, yntymaqtan esh qalmastan.

Mılletke bek zor úmit — shákirt halqy
At bolsa da, bizderde joq qoı qalpy:
Jabystyq kóringenniń etegine,
Bir baqas jattap alyp shala-sharpy.

Keıimiz pándi oqý — aram dedik,
«Hashıa» jattap, újmaqqa baram dedik,
Burynǵy taqyr talas qalpymyzda
Atanyń jolyn qýyp qalam dedik.

Keıimiz halyq uıqysyn asham dedik,
Umtylyp ilgeri aıaq basam dedik.
Ata tursyn, babanyń joly bolsyn,
Zalaldy joldan bezip qasham dedik.

Dóńinen nadandyqtyń asam dedik,
Mılletke raýshan nur shasham dedik.
Úırenip árbir túrli óner-ǵylym,
Teńizdeı darıa bolyp tasam dedik.

Keıimiz sálde, shapan kıem dedik,
Súzilip basty tómen ıem dedik.
Aqpeıil adalsynǵan sopy jan bop,
Súıtip-aq pidıe, zeket jıam dedik.

Keıimiz ony kórip, oǵan erdik,
Azdan soń ony tastap, buǵan keldik.
Kóńildi eshbirine boı salǵyzbaı,
Toqtaýsyz ortasynda attaı jeldik.

Keıimiz tıip qashpa alańǵasar
Qyldaı sózdi taýdaı ǵyp jurtka shashar.
Jandy qıǵan kisi bop jyltyraımyz.
Kisini myqtap saılap, úrkip qashar.

Bilemiz yntymaqsyz is ońbaıdy,
Tartynyp shý-shýletken kisi ońbaıdy.
Bizde bar aqqý, shortan, shaıan qalpy,
Bizdiń is búıtýmenen esh ońbaıdy.

Mıllettiń kel de birik, al jastary,
Qyzmet qyl, ótkir qylysh almastary!
Bárimiz qýat qosyp birge tartsaq,
Anyq qoı nadandyqta qalmastary.

*Talıp (arabsha) – shákirt degen uǵymdy bildiredi.
*Hashıa (arabsha) – túsinik degen sóz. Bul jerde kitap aty.
*Pidıe (arabsha) – óliktiń basyna azyq, ıakı sonyń qunyna shaǵyp shyǵarǵan sadaqa.
*Zeket (arabsha) – ıslam sharıǵaty boıynsha mal sanyna beriletin sadaqa.

---