InfoHub Logo

Qazaqstanǵa alǵash ret resmı saparmen kelgen Halyqaralyq kınologıa federasıasynyń (FCI) prezıdenti Tamash Iakkel Aqordadaǵy tazy músini men ásem baqshany kórip, rızashylyǵyn bildirdi. Ol sondaı-aq, Qazaqstan Prezıdentine ulttyq ıtimiz – tazy tuqymyn saqtaý men damytýǵa kórsetken jeke qamqorlyǵy úshin alǵys aıtty.

Bul týraly Infohub.kz aqparat agenttigi habarlaıdy.

Tamash Iakkeldiń aıtýynsha, FCI eki jyl buryn tazy tuqymyn resmı túrde moıyndaǵan. Ótken jyly Helsınkıde ótken álemdik kórmede tazy tuqymynan shyqqan ıt «Álem chempıony» ataǵyn ıelengen. Bul – Qazaqstan kınologtary odaǵynyń zor eńbeginiń nátıjesi.

Tazy – ulttyq maqtanysh

«Tazy – bul tek ıt emes, ol qazaq halqynyń ulttyq mádenı murasynyń bir bóligi. Bul tuqymnyń álemdik kınologıada laıyqty ornyn alýyna qýanyshtymyn», – dedi Tamash Iakkel.

Ol sondaı-aq, Prezıdenttiń jeke úıinde tazy ıti baryn bilgenin aıtyp, Aqordadaǵy tazy músini ornatylǵan baqshanyń kórkemdigine tánti bolǵanyn jetkizdi.

Kınologıany damytýdaǵy memlekettik qoldaý

FCI prezıdenti kınologıa salasyndaǵy mamandarǵa memleket tarapynan kórsetiletin qoldaýdyń mańyzdy ekenin atap ótti. Ol Qazaqstannyń kınologıany damytýǵa qosqan úlesin joǵary baǵalap, federasıa jumysynyń halyqaralyq deńgeıdegi mańyzdylyǵyn aıtyp ótti. FCI bergen qujattar men shejireler álemniń 100 elinde jaramdy.

«Men sizdiń mamandaryńyzǵa qoldaý kórsetýdi suradym. Sapaǵa qoldaý kórsetken saıasatker nemese Prezıdent – bul el azamattary úshin úlken baqyt. Men sizderdiń tamasha elińizben jaqynyraq tanysyp, kóbirek jaqsy esteliktermen ketýge úmittenemin. Osy demalys kúnderi men halyqaralyq ıt kórmesinde tóreshi bolamyn. Buryn-sońdy 60 tazyny birdeı kórgen emespin. Sondyqtan bul sharany asyǵa kútip júrmin», – dedi Tamash Iakkel.

Aıta keteıik, 30 sáýirde Memleket basshysy Qasym-Jomart Toqaev FCI prezıdenti Tamash Iakkeldi Aqordada qabyldady. Kezdesýde otandyq ıt ósirýdi damytý jáne tuqymdyq genofondty saqtaý isinde halyqaralyq federasıamen yntymaqtastyq perspektıvalary talqylandy.