InfoHub Logo

Kórshiles otyrǵan kúshik eliniń qaýǵasaqal bir shaly men bir jastaý jigiti kóship-qonýǵa yńǵaılanǵan eldiń asyǵyp, birbetkeı qımyldap, maldy ıesiz qaldyratynyn eske alyp, ońaı olja túsirip qalýdy oılap atqa minedi. Tuǵyrǵa shyǵyp, aýyl mańyndaǵy bir saıda qoılardyń kúzetsiz erkin jaıylyp júrgenin kóredi. Attaryn dóń astyna tusap qaldyryp, jasyrynyp kelip nán bir qoıdy ustap, tórt aıaǵyn baılap, qaraǵannyń ishine aparyp tastaıdy. Taǵy bir qoıdy almaq bolyp qaıta keledi. Jartastyń túbinde buǵynyp, urylardyń árbir qımylyn ańdyp kórip otyrǵan bir jas bala aldarynan tosyn kezdesip:

— Assalaýmaǵaleıkúm, atalar, — dep sálem beredi.

Urylar abyrjyp, turyp qalady. Jastaý jigit:

— Biz bóten adamdar emespiz, qaraǵym! Kórshiles aýyldyń adamdarymyz, ózderińniń aǵaıyndas — kúshikpiz. Joq izdep júrmiz, — deıdi balaǵa syr bermeýge tyrysyp.

— Sizdiń kúshik ekenińizdi jymıǵan bet-aýzyńyzǵa qarap-aq túsinip turmyn, aǵaı! Myna qasyńyzdaǵy tóbetińiz qaıda barady? — depti bala. Súıekterinen ótken ashshy sózge shydaı almaı, eki ury balaǵa qaraı tura umtylǵan eken.

— Attan, attan! Kúshik aýlynyń kúshigi men tóbeti birlesip, meni talaǵaly jatyr. Attan! — dep bala aıǵaılap, qoldaryna túspeı qasha jóneledi.

Balanyń daýsyna estigen aýyl adamdary atqa qonyp, eki uryny ustap alyp, dúre soǵyp, aýyldaryna jaıaý qaıtarypty.

---