InfoHub Logo

Este joq eski zamanda dombyrada jalǵyz ǵana ishek, taýqudirette jalǵyz ǵana qanat bolypty. Taýqudirettiń jalǵyz qanaty erkeginiń oń jaǵyna, urǵashysynyń sol jaǵyna bitedi eken. Dombyra ne isterin bilmeı ishten tynady. Taýqudiret bolsa kúndiz-túni Táńirge muńyn shaǵyp, qalyqtap usha alatyn qos qanat surap, «qudiret-aý, qudiret» dep jalbarynýmen bolypty.

Kúnderdiń bir kúninde taýqudirettiń atalyǵyna bir oı keledi, «búıtip zarlap júre bergenshe, talpynyp tirlik etip kóreıik» deıdi de, analyq taýqudiretpen qoldasyp ushýdy oılaıdy. Birinde — oń qanat, ekinshisinde — sol qanat, eki taýqudiret bir-birimen qoldasyp, qanattaryn kere serpedi. Sol kezde jerden baýyrlary kóterilip, qalyqtaı ushyp jóneledi. Jer beti dóńgelenip tómende qalady. Qos taýqudirettiń qanattaryn jel súıemeldep, kók júzinde raqattana samǵaıdy. Sonda kóńilderi shattanǵan qos taýqudiret qýanyshtaryn jasyra almaı «qudiret-aý, qudiret, munyńa da shúkirshilik!» dep Táńirge rızashylyqtaryn bildiripti. Keıin bul taýqudiretterden týǵan balapandarǵa táńiri qos qanat darytyp edi deıdi.

Osy oqıǵadan qulaǵdar dombyrashy «Qos qanat birigip edi — ushty, eger dombyrada qos ishek bolsa she?» deıdi de, ekinshi ishek taǵyp kóredi. Sonsoń qos ishekti dombyrasyn tartyp kórse, ǵajaıyp ún shyǵady deıdi. Dombyrashynyń qýanyshynda shek bolmaıdy. Tipten, rıza bolǵandyǵy sonsha — eń alǵashqy kúıin taýqudiretke arnaıdy. Taýqudirettiń alǵashqyda qalaı qınalǵanyn, «qudiret-aý, qudiret» dep Táńirge qalaı jalbarynǵanyn, sonsoń qoldasa ushyp kókke samǵaǵanyn kúı tiline salady.

Shynynda da, bul kúıdi tyńdap otyrǵanda, kósip shertetin tustary «Qudiret-aý, qudiret» dep sóılep qoıa bergendeı áser etedi.

---