(M. Iý. Lermontovtan)

Asaý Terek doldanyp, býyrqanyp,
Taýdy buzyp jol salǵan, tasty jaryp.
Arystannyń jalyndaı buıra tolqyn
Aıdahardaı búktelip, júz tolǵanyp.

Kavkazdan shyqty jaınap, qylyp ý-shý,
Túzý jerden jol kernep ulǵaıdy sý.
Qalyń qaırat boıynda, beti kúlip,
Momynsynǵan pishinmen aǵady qý.

Kavkazdaı quzda týǵan perzenttenmin,
Bulttyń sútin emip erjetkenmin.
Kazbekten, aǵam, seni kóksep shyǵyp,
Kim qaqtyqsa jolymda kúıretkenmin.

Zor keýde adamzattyń aılasyna
Kónbeı, búgin kúshimdi kórsetkenmin.
Eki ezýim kópirip, aıǵaılasam,
Shyn qutyrsam shyń tasty terbetkenmin.

Aptyǵyp asaý iniń keldi, aqsaqal!
Taý, tasqa, adamzatqa salyp janjal.
Dem alaıyn dep keldim, ash qoınyńdy,
Sálem-saýqat ákeldim, qosh kórip al.

Ákelgen buǵy menen maralym bar,
Adamnan tartyp alǵan kóp malym bar.
Er-toqymy, atymen, qarýymen
Er sherkesti ákelgen amalym bar.

Munyń bári — tartýym sizge,— deıdi,
Aqylyńdy aıt, aqsaqal, bizge,— deıdi.
Baqsha, zaýat, jaılardy qyldym talqan,
Árbir baı jaldap jatyr júz kedeıdi.
Qartań Kaspıı qalǵyǵan boıymenen
Terekke kózin ashyp úndemeıdi.

— Azyrqandyń, bilemin, aqsaqal shal,
Tentegińniń sózine qulaǵyń sal.
Kazak-orys qatyny bir sulýdy
Ákelip em, qaıteıin, ony-daǵy al!

Kári Kaspıı qara kók kózin ashty,
Jyly júzben Terekke amandasty.
Jybyr qaǵyp, qozǵalyp, sylq-sylq kúlip,
Qatyndy aldy, qıtyqsyz aralasty.

---