(A. S. Pýshkınnen)
Táńiri qosqan jar ediń sen,
Jar ete almaı ketip eń.
Ol kezimde bala edim men,
Aıamasqa bekip eń.

Talaq etip bul ǵalamdy,
Boldy málim ketkeniń,
Kinási joq jas adamdy
Qatty soqqan ne etkeniń?
Eljiregen jas emes pe em?
Eppen aıtsań jubatyp.
Men ǵashyqqa mas emes pe em?
Ketseń edi uzatyp.
Sen jaraly jolbarys eń,
Men kıiktiń laǵy em.
Tiri qaldym, ólmeı áreń,
Qatty batty tyrnaǵyń.

Bul kiná emes, ánsheıin naz,
Saǵynamyn, aıtamyn.
Dosyń-aqpyn, taǵdyr araz,
Tolǵanamyn, qaıtemin.
Sen shoshydyń ǵashyǵyńnan,
Ózge jurttan qamshy jep.
Men de sorly násibimnen,
Jatqa tıdim alshy dep.
Jar tabylmas sen sekildi,
Men de sendeı sorly zar.
Qol-aıaǵym berik bekildi,
Endi neniń orny bar?
Óz qorańnyń qaqpasyn sen
Qatty japtyń, ne aıtaıyn.
Jat qoranyń taqtasyn men
Jastanamyn, qaıteıin.

Qaımaq edi kóńilimde,
Bizge qaspaq boldy jem.
Eki sóz joq ómirimde,
Men de – sorly baqyty kem.

Esh qyzyqqa armanym joq,
Bári de bar formynyń.
Bireýine qanǵanym joq,
Ózime aıan sorlymyn.

Janym ǵashyq asylym eń,
Jar esigin bermediń.
Sorǵa bitken ǵashyǵymsyń,
Nege tym kesh sermediń?

Jat esikti jáne qoryp,
Jara salma sen maǵan.
Jurt jamandar jatqa joryp,
Jalynamyn men saǵan.

Úshbý qıal kelse basqa,
Sen júder dep men úshin.
Bolar edi qaınamasqa,
Mys qazandaı sorly ishim.

Ǵashyq-aqpyn esh kúmánsiz,
Yrys emes, sor úshin.
Kórisýge shydamaspyz,
Aırylalyq sol úshin.

---