(I. A. Krylovtan)

Shyryldaýyq shegirtke
Yrshyp júrip án salǵan.
Kógaldy qýyp gólaıttap,
Qyzyqpen júrip jazdy alǵan.

Jazdygúngi japyraqtyń
Birinde tamaq, birinde úı,
Japyraq ketti, jaz ketti,
Kúz bolǵan soń ketti kúı.

Jyly jaz joq, tamaq joq,
Ókingennen ne paıda?
Sýyqqa tońǵan, qarny ashqan
Oıyn qaıda, án qaıda?

Onymenen turmady,
Qar kórindi, qys boldy.
Saýyqshyl sorly búkshıdi,
Tym-aq qıyn is boldy.

Sekirý qaıda, súrinip,
Qabaǵyn qaıǵy jabady.
Salamda jatyp dán jıǵan
Qumyrsqany izdep tabady.

Selkildep kelip jyǵyldy,
Aıaǵyna bas ura:
= Qaraǵym, jylyt, tamaq ber,
Jaz shyqqansha asyra!

Munyń, janym, sóz emes,
Jaz óterin bilmep pe eń?
Janyń úshin esh sharýa
Ala jazdaı qylmap pa eń?

Men ózińdeı sharýashyl,
Jumsaq ıleý úıli me?
Kógaldy qýyp, án salyp,
Óleńnen qolym tıdi me?

Qaıtsin, qoly tımepti,
Óleńshi, ánshi esil er!
Ala jazdaı án salsań,
Selkilde de, bıleı ber!

---