InfoHub Logo

Freedom Holding Corp. basshysy Tımýr Týrlov álemdegi jetekshi bıznes-mektepterdiń biri – Stenford ýnıversıtetiniń bıznes-mektebinde (Stanford Graduate School of Business) dáris oqydy. Onda kompanıanyń "Freedom Holding: Building an Ecosystem as a Path to Scale" atty keısi MBA baǵdarlamasyna engizilip, talqylandy. Bul keıs jergilikti brokerlik kompanıanyń bank, saqtandyrý, tólem qyzmetteri, laıfstaıl baǵyttary jáne jeke sýperapp-ty qamtıtyn sıfrlyq ekojúıege aınalý prosesin qamtydy.

Bul týraly Infohub.kz aqparat agenttigi habarlaıdy.

Ashyq leksıa formatynda ótken kezdesýde Tımýr Týrlov Freedom ekojúıesiniń damýy, sýperapp-tar arasyndaǵy báseke, qarjy salasyndaǵy senim jáne Qazaqstannan sıfrlyq modelderdi eksporttaý máselelerine toqtaldy.

Stýdentterdiń qyzyǵýshylyǵy

Týrlovtyń aıtýynsha, stýdentter kompanıanyń keısin tereń zerttep, óte ózekti suraqtar qoıǵan. "Keıbir talqylaýlar sonshalyqty mańyzdy boldy, men mundaı suraqtardy óz komandamnan ǵana kúter edim", – dedi ol kezdesýden keıin.

Keıstiń avtorlarynyń biri, profesor Hovard Rozen Freedom Holding Corp.-tyń Stenford GSB oqý baǵdarlamasyna ený sebebin túsindirdi. Onyń aıtýynsha, kompanıa tek qarqyndy damyp kele jatqan bıznes retinde ǵana emes, sonymen qatar naryq suranysyna saı ónimdi (product-market fit) tabý jáne jetildirý úlgisi retinde tańdalǵan.

Rozen Freedom-nyń tarıhy stýdentterge sıfrlyq bıznestiń negizgi kórsetkishterin taldaýǵa múmkindik beretinin atap ótti. Olar klıent tartý quny, paıdalanýshylardyń belsendiligi jáne ekojúıe ishinde aýdıtorıany ustap turý tetikteri sıaqty mańyzdy aspektilerdi zerttedi.

Ekojúıege aınalýdyń mańyzy

Profesordyń aıtýynsha, Stenford úshin kompanıanyń transformasıasy erekshe qyzyǵýshylyq týdyrǵan. Freedom bastapqyda brokerlik qyzmet kórsetse, keıin birtindep tolyqqandy sıfrlyq ekojúıege aınalǵan.

Bul keıs Ortalyq Azıadan shyqqan iri bıznes týraly Stenford GSB-daǵy alǵashqy zertteýlerdiń biri boldy. Rozen Qazaqstannyń qarqyndy damyp kele jatqan sıfrlyq naryq ekenin jáne halyqaralyq kásipkerlikti zertteý úshin mańyzdy aımaq ekenin birneshe ret atap ótti.

Básekelestik jáne senim

Leksıa case discussion formatynda ótti. Profesor Rozen kompanıa tarıhynan platforma ekonomıkasy, qarjy ınstıtýttaryna degen senim jáne Qazaqstannyń jetekshi sıfrlyq ekojúıeleri arasyndaǵy báseke sıaqty keń aýqymdy máselelerge aýysyp otyrdy.

Stýdentter birneshe segmentte qatar masshtabtalý, sýperapp-qa basymdyq berý, satyp alynǵan qyzmetterdiń ıntegrasıasy, ekojúıege travel-baǵyt pen bılet satýdyń qajettiligi, sıfrlyq platformalar arasyndaǵy básekeniń ózgerýi jáne Freedom ekojúıelik modelin basqa elderge eksporttaý múmkindigi týraly suraqtar qoıdy.

Týrlov senim taqyrybyna erekshe toqtaldy. Ol kompanıanyń tehnologıadan buryn senimdi qurýdan bastalǵanyn túsindirdi. Sebebi, adamdar kúndelikti qoldanatyn debettik kartadaǵy balansqa, buryn kórmegen brokerlik anyqtamaǵa qaraǵanda áldeqaıda ońaı senetinin aıtty.

Ortalyq Azıadaǵy ekojúıeler básekelestigi talqylandy. Týrlovtyń aıtýynsha, sýperapp ishinde paıdalanýshylardy ustap turý jeke qosymshalarǵa qaraǵanda bes ese joǵary. Freedom bastapqydan birtutas ekojúıe retinde qurylǵan, onda ár kompanıa tek basqalarmen baılanysta ǵana maǵynaly bolady.

Sıfrlyq eksport jáne táýekelder

Stýdentter kompanıanyń halyqaralyq ekspansıasy jáne Qazaqstannyń óz sıfrlyq ekojúıelerin eksporttaı alatyny týraly da surady. Týrlovtyń pikirinshe, elder arasyndaǵy báseke shıkizat pen ónerkásipten sıfrlyq sheshimder salasyna aýysyp jatyr. Ol bolashaqta sıfrlyq ónimderdiń negizgi eksport bolatynyna senimdi ekenin jetkizdi.

Kezdesý barysynda qarqyndy damyp kele jatqan kompanıalarǵa qysym kórsetý máselesi de qozǵaldy. Týrlov Freedom-nyń ósý barysynda kóptegen tekserýlerge, aqparattyq shabýyldarǵa jáne jaǵymsyz jarıalanymdarǵa tap bolǵanyn aıtty. Sondyqtan kompanıanyń strategıasynyń bir bóligi jarıalylyq bolǵanyn atap ótti. "Eger siz óz tarıhyńyzdy ózińiz aıtpasańyz, ony basqa bireý aıtady, al onyń sizge unaıtyny ekitalaı", – dedi ol.

Qazirgi tańda Freedom biryńǵaı sıfrlyq ekojúıe aıasynda bank, brokerlik, saqtandyrý, tólem jáne laıfstaıl qyzmetterin damytýda. Kompanıa málimeti boıynsha, Freedom SuperApp-tyń aı saıynǵy aýdıtorıasy shamamen 2,7 mıllıon belsendi paıdalanýshyny quraıdy.