InfoHub Logo

Aıtys óneriniń janashyry, aqyn Júrsin Erman densaýlyǵyna baılanysty bastan keshken aýyr kezeńin alǵash ret ashyq aıtyp, sol sátte Memleket basshysy Qasym-Jomart Toqaevtyń qoldaý kórsetkenin jetkizdi. Bul týraly ol "1001 tún" baǵdarlamasynda aıtty.

Bul týraly Infohub.kz aqparat agenttigi habarlaıdy.

Aıaǵymdy kesýge májbúr bolǵanda...

Aqynnyń aıtýynsha, qant dıabeti densaýlyǵyna qatty áser etip, jaǵdaıy kúrt nasharlaǵan. Almatydaǵy bedeldi medısınalyq ortalyqta em qabyldaǵanymen, dárigerler onyń aıaǵyn kesý qajettigin aıtqan.

"Meni qurtqan – qant. Onyń qaıdan kelgenin kim biledi?! Qatty aýyrdym. Almatydaǵy bedeldi aýrýhanada emdeldim. Meni qarap júrgen dáriger aıaqty kesý kerektigin aıtty. "Bulaı jasamasaq bolmaıdy, ólip qalasyń" dedi. Adamnyń aıaǵyn kesý ońaı ma?! Qoımaı shetelge baryp kelemin dep sheshtim. Shveısarıaǵa ketip qaldym. Ol jaqta qudam bar. Dúnıejúzilik densaýlyq saqtaý uıymynyń bas dırektory. Olar meni qarap, aıaqty kesýdiń qajeti joq ekenin aıtty.

Prezıdenttiń qoldaýy

Shveısarıaǵa barý ońaı bolǵan joq. Prezıdentim Qasym-Jomart Toqaev baryp emdelip kel dep, kóp aqsha berdi. Ony bylaı ózi aıtpaıdy. Biraq men ishimnen bilip turmyn, rıza bolyp turmyn. Solaı aıaǵymdy kestirmeı, qaıtyp keldim. Bir kúni aýrýhanadan eki-úsh kún qaldy dep shyǵaratyn boldy. Qyzdarym qarap, shóptermen emdep, aman alyp qaldy. Halyqtyń da qoldaýy dem beredi", - dep jan syryn aqtardy aqyn.

Júrsin Erman kim?

Aıta keteıik, Júrsin Moldashuly Ermanov – 1951 jyly Qaraǵandy oblysynyń Ulytaý óńirinde dúnıege kelgen aqyn, jýrnalıs jáne aıtys ónerin jańǵyrtýshylardyń biri. Ol qazaq aıtysyn teledıdar men radıoda keńinen nasıhattap, kóptegen respýblıkalyq aıtystardyń uıymdastyrýshysy boldy. "Janartaý", "Araıly kún, armysyń!", "Ulytaýǵa bardyń ba?..", "Qudiretke júginý", "Eki tizgin, bir shylbyr" syndy kitaptardyń avtory. Qazaqstannyń eńbek sińirgen qaıratkeri, "Qurmet" ordeniniń ıegeri.