Toqta, botam!
Atań keledi artyńda!
Bur moınyńdy qaljyraǵan qart ulǵa.
Seniń sábı sátterińniń mysqalyn
Aıyrbastap ala almaı júr altynǵa.
Toqta, botam!
Atań keledi artyńda!
Júze júrip, júz qubylǵan saǵymda,
Jastyq deıtin kóktemeniń shaǵynda,
Ósken edik seniń anań ekeýmiz
Osy qarttyń mápelegen baǵynda.
Qarttyń baǵyn jaılaıtynbyz ıen tegin,
Tyńdaıtynbyz alýan-alýan ertegin.
Jınap alyp júrer edi jaryqtyq
Kúlli aýyldyń elteńi men selteńin.
Eı, bolashaq!
Qart keledi zıaly,
Keıimesin ata-qyran uıaly.
Sen syılasań, sábı shaqtyń bir sátin,
Atań saǵan uzaq ómirin qıady.
Aqylyna aıyrbasta kúlkińdi,
Qaıtesiń sol kúlki deıtin shirkindi?!
Beıqam kúlip óspegen soń óz basym,
Bos kúlkini unatpaımyn bir túrli...
Toqta, botam! Atań keledi artyńda.
Darıa shalqar danalyǵyn al, tyńda!
Seniń sábı sátterińniń mysqalyp
Aıyrbastap taba almaı júr altynǵa.
Toqta, botam! Atań keledi artyńda!

---