InfoHub Logo

Maqsaty: 1. Balalardyń tórt túlik mal týraly túsinikterin keńeıtý.
Olardyń tólderin ajyrata bilýge úıretý.
Maldyń paıdasy jaıly aıtyp úıretý.
Tárbıelik: Úı janýarlaryna degen qamqorlyqqa tárbıeleý.
Damytýshylyq: Balalardyń sózdik qorlaryn damytý.
Sózdik qorlaryn jańa sózdermen tolyqtyrý.
Kórnekilikter: Jaılaý maketi, qorjyn, janýarlar mýlájdary, slaıdtan tórt túlik mal.
Sabaq túri: Saıahat sabaq.
Ádis - tásilderi: Jumbaq sheshý, oıyn oınaý, óleń oqý, áńgimeletý, dıdaktıkalyq oıyn.
Sabaqtyń barysy: Uıymdastyrý kezeńi:
Psıho jattyǵý.
1 - bala: Biler qazaq balasy,
Sálem sózdiń anasy.
Aldymyzdan kezikken,
Kóp tanysty kóremiz.
Bárine de izetpen,
Bizder sálem beremiz.
Bári: Sálemetsizder me.
Shattyq sheńberi: Qaıyrly tań, kók aspan!
Qaıyrly tań, jer ana!

Tárbıeshi: Aıtyńdarshy balalar, jaılaýǵa jurt qaı ýaqytta shyǵady?
Balalar: Kóktemde shyǵady.
Tárbıeshi: Balalar men senderge jaılaýǵa saıahatqa shyǵýdy usynamyn. Burynda ata - babamyz jaılaýǵa atpen, arbamen shyǵatyn. Búgin biz de atpen
jaılaýǵa shyǵamyz.
(Qabyrǵada súıeýli turǵan attarǵa qarap:)
- Mine, bizdiń arǵymaqtarymyz da ázir tur. Attaryńa minińder.
(Balalar bir - bir oıynshyq attardy alyp, minip, biriniń artynan biri turyp, daıyndala bastaıdy)
«Adaı»kúıi oryndalyp turady, balalar jaılaýǵa keledi.
Tárbıeshi: - Al, biz jaılaýǵa da kelip jettik. Bárimiz kózimizdi jumyp taza aýamen dem alaıyqshy.
- Biz saıahatqa qaıda keldik?

Balalar: Jaılaýǵa keldik.
(Aldarynan Shopan ata shyǵady)
Tárbıeshi: Durys, jaılaýǵa keldik. Shopan ata da osynda eken ǵoı, sálemetsiz be?
Shopan ata: Sálemetsińder me, balalar! Bizdiń jaılaýǵa kelgenderińe qýanyshtymyn.
Balalar: Sálemetsiz be!
Tárbıeshi: Balalar Shopan ata qoıdyń ıesi.
Shopan ata: Balalar tórt túlik malǵa ne jatatynyn bilesińder me?
Balalar: Túıe, jylqy, sıyr, qoı jatady.
Shopan ata: Durys aıtasyńdar. Al endi osy janýarlarǵa baılanysty jumbaq sheship kórińdershi
1. Kishkene ǵana boıy bar,
Aınaldyryp kıgen tony bar.(Qoı)
Tárbıeshi: Al osy jerden qoıdy kim taýyp kórsetedi?
(Jumbaq sheshken kezde balalar janýarlardyń maketin kórsetedi)
Shopan ata: 2. Kezikti bir janýar,
Ústinde eki taýy bar.(Túıe)
3. Basynda eki taıaǵy bar,
Tórt aıaǵy bar.
Biraq taǵy saqaly bar.(Eshki)
4. Eki aınasy bar,
Eki naızasy bar.
Tórt jyltyrmaǵy bar,
Bir shybyrtqysy bar.(Sıyr)
5. Ekeý eleńdep keledi,
Tórteý tóbelesip keledi.(Jylqy)
Tárbıeshi: Bul tórt túlik maldyń adamǵa paıdasy bar ma?
Balalar: Bar.
Tárbıeshi: Qandaı paıdasy bar, bizge ne beredi?
Balalar: Sút, et. jún beredi.
Tárbıeshi: Túıeniń sútinen ne jasaıdy?
Balalar: Shubat.
Tárbıeshi: Al, jylqynyń sútinen ne jasaıdy?
Balalar: Qymyz.
Tárbıeshi: Sıyr, qoı, eshkiniń sútinen ne jasaıdy?
Balalar: Maı, qurt, aıran, irimshik jasaıdy.
Tárbıeshi: Qoıdyń, eshkiniń, túıeniń júninen ne jasaıdy?
Balalar: Jip, kıim toqıdy, kórpe jasaıdy.
Shopan ata: Apaı myna balalaryńyzǵa rıza bolyp turmyn, tórt túlik týraly kóp biledi eken.
Dıdaktıkalyq oıyn: «Kim qalaı dybystaıdy?»
Tárbıeshi: Men qazir qandaı janýardy kórsetsem, sol janýardyń qalaı dybystaıtynyn aıtasyńdar.

Sıyr - Mó - mó
Qoı - Má - má
Túıe - Bó - bó
Jylqy - E - e - e
Eshki - Máá - máá
Tárbıeshi: Óte jaqsy, durys aıttyńdar. endi meni tyńdańdar, maldyń dybystaǵanyn bylaı dep aıtady.
Jylqy - kisineıdi.
Sıyr - móńireıdi
Qoı, eshki - mańyraıdy
Túıe - bozdaıdy.
- Bárimiz osy sózderdi qaıtalap uǵyp jattap alaıyq.(Balalar qaıtalaıdy)
Sergitý sáti: «Qımylmen kórset»
Balalar dóńgelenip turady.
Tárbıeshi: Qoshaqany qoıdyń,
Qaıda qalyp qoıdyń?
Tompıyp tur búıiriń,
Qaı óristen toıdyń?
(Balalar Shopan atamen qoshtasyp, atqa minip topqa keledi.)
Tárbıeshi: Balalar osy tórt túlik mal týraly maqal bilesińder me?
1. Jylqy maldyń - patshasy,
Túıe maldyń - qasqasy.
2. Mal ósirseń, qoı ósir,
Ónimi onyń kól - kósir.
3. Túıe maldyń úlkeni,
Jylqy maldyń úrkegi.
4. Maldy baǵa bil,
Babyn taba bil.
Dıdaktıkalyq oıyn: «Tólin tap»
Erejesi: Tárbıeshi eki makettiń nemese sýrettiń bir syńaryn kórsetedi, al syńaryn shaqyrǵan bala taýyp, qataryna qoıady.
Túıeniń tóli - bota
Jylqynyń tóli - qulyn
Sıyrdyń tóli - buzaý
Qoıdyń tóli - qozy
Eshkiniń tóli - laq.

Qorytyndy suraqtar qoıylady.
Tárbıeshi: Tórt túlik malǵa ne jatady eken?
Balalar: Qoı, eshki, sıyr, jylqy, túıe jatady.
Tárbıeshi: Qandaı jańa sózdermen tanystyq?
Balalar: Jylqy kisineıdi, sıyr móńireıdi, túıe bozdaıdy, qoı mańyraıdy.
Tárbıeshi: Óte jaqsy balalar. Búgin bárińde sabaqqa jaqsy qatystyńdar. Senderge
Shopan ata da rıza boldy.