InfoHub Logo

Túlki men bódene ekeýi aıyrylmas dos bolypty. Eki dos talaı jerdi sharlapty, talaı qyzyq kóripti.

         Kúnderde bir kúni:

         — Dosym, meni bir kúldirshi, – depti túlki.

         — Jaraıdy, kúldireıin. Sen meniń artymnan er de otyr. Men ushamyn da otyramyn, – depti bódene.

Sonymen bódene ushypty da otyrypty, túlki jele jortyp, eripti de otyrypty. Bir jerge kelse, bir kempir sıyr saýyp otyr eken, shaly buzaýdy ustap tur eken. Bódene ushyp baryp, sıyr saýyp otyrǵan kempirdiń basyna qona ketipti. Túlki anadaı jerde tyǵylyp qarap turypty.

         Bódeneni kóre sala:

         — Kempir, kempir, qozǵalma! Men myna tóbeńdegi bódeneni soǵyp alaıyn, – depti shal.

         — Jaraıdy. Biraq qatty soqpa, – depti kempir. Shal jerde jatqan kúrekti alyp, salyp qalǵanda, bódene usha jónelipti. Kúrek kempirdiń basyna tıip, kempir qulapty. Shelektegi súti tógilip qalypty. Túlki ishek-silesi qatyp kúlipti.

         — Dosym, kúldiń be? – depti bódene.

         — Kúldim, dosym, kúldim. Razymyn, dosym, razymyn! – depti túlki.

         Kúnderde bir kún túlki:

         — Al, dosym, endi meni bir myqtap turyp qorqytshy! – depti.

         — Qatty qorqytaıyn ba, ashýlanbaısyń ba? – dep surapty bódene.

         — Joq, ashýlanbaımyn, qatty qorqyt! – depti túlki.

         — Jaraıdy, qorqytaıyn. Biraq sen kózińdi tas qylyp jum. Men seniń tóbeńe qonyp, eki qanatymmen kózińdi jabamyn. Sodan keıin sen júr de otyr. Ońǵa desem ońǵa, solǵa desem solǵa júr. Qashan men tóbeńnen ushyp: «Kózińdi ash!» degenshe, ashpa, – depti bódene.

         Sonymen bódene túlkiniń tóbesine qonyp, eki qanatymen kózin jaýypty. Túlki kózin tas qylyp jumyp, bódeneniń júr degen baǵytyna júripti de otyrypty. Osylaı júrip keledi, júrip keledi.

         Bir kezderde bódene:

         — Ash kózińdi! – dep usha jónelipti. Túlki kózin ashyp jiberse, tazy ertken bir top ańshyǵa taıanyp qalǵan eken. Ańshylar qyzyl túlkini kóre sala qıqýlap, qýyp beripti. Túlki qashyp beripti. Ári-beri qashqan soń, túlkiniń aldynan qalyń orman kez bolypty. Túlki jalt berip, ormanǵa kelip, ańshylardan ázer qutylypty.

         Bir kezde bódene kelip:

         — Qalaı, dosym, qoryqtyń ba? – dep surapty.

         — Qorqytqanda, osylaı qorqyt dep pe edim?! – dep, túlki bódeneni bas salyp, jemek bolypty,

         Bódene túlkiniń aýzynda turyp:

         — Dosym! Uzaq jyldar dos bolyp, oınap-kúldik, talaı qyzyq kórdik. Qazir meni jegeli tursyń. Qaıtem, jeseń je! Biraq, osy kúnge deıin aty–jónimizdi surap bilisken emespiz. Jeseń de, atymdy aıtyp jeseıshi, aqyrǵy tilegim bolsyn! – depti.

         — Al, aıta ǵoı, atyń kim edi? — depti túlki.

         — Atym Mańǵyt, – depti bódene. Túlki aýzyn ashyp:

Mańǵyt deı bergende:

         — Aýzyńa sańǵyt! – dep, bódene usha jónelipti.

         Osydan bylaı túlki men bódene dostyqtan aıyrylysypty.

---