InfoHub Logo

Belgili akter Tuńǵyshbaı Jamanqulov óziniń jubaıy Dárıa Ábdimálikqyzy Júsippen qalaı tanysyp, shańyraq kótergeni týraly buryn estimegen qyzyqty jaıttardy aıtyp berdi.

Bul týraly Infohub.kz aqparat agenttigi habarlaıdy.

Akterdiń aıtýynsha, ol óziniń shákirtine ǵashyq bolyp, keıin úılengen. Jamanqulovtyń sózinshe, Dárıaǵa degen sezimi birte-birte tereńdep, úlken mahabbatqa aınalǵan.

Mahabbat jasqa qaramaıdy

«Men ózimniń shákirtim Dárıaǵa úılendim ǵoı. Esimnen tandyrdy, ǵashyq boldym, úılendim. Jasy biraz jas. Aramyz eki múshel. Eki ul bir qyzymyz bar, qudaıǵa shúkir, qasymda. Áli de basymda bolmaıdy dep garantıa bere almaımyn», – dep ázildedi Tuńǵyshbaı Jamanqulov.

Akter jubaıyna degen sezimin erekshe yqylaspen jetkizip, otbasylyq ómirine rızashylyǵyn bildirdi. Ol adamnyń júregine ámir júrmeıtinin jáne ómirde túrli jaǵdaılar bolatynyn atap ótti.

Tuńǵyshbaı Jamanqulov kim?

Tuńǵyshbaı Qadyruly Jamanqulov – qazaq teatr jáne kıno óneriniń kórnekti tulǵasy, rejıser ári teatr pedagogy. 1948 jyly Jambyl oblysynda dúnıege kelgen ol jastaıynan ónerge jaqyn bolyp, akterlik mamandyqty tańdaǵan.

1970 jyly Muhtar Áýezov atyndaǵy Qazaq memlekettik akademıalyq drama teatryna qabyldanǵan akter, 1973 jyly Qazaq ulttyq konservatorıasynyń akterlik fakúltetin támamdady. Sahnada Baqtyǵul, Syrym, Abylaı han sıaqty kóptegen beınelerdi somdap, kórermen yqylasyna bólendi.

Kıno salasynda da «Otyrardyń kúıreýi» fılmindegi Qaıyrhan róli úshin Qazaqstan Respýblıkasynyń Memlekettik syılyǵyn alǵan. Akterlik qyrynan bólek, rejıser retinde de ónerge eleýli úles qosqan. 1993-2001 jyldary Muhtar Áýezov atyndaǵy teatrdyń bas dırektory qyzmetin atqardy.

Eńbegi úshin Tuńǵyshbaı Jamanqulov Qazaqstannyń eńbek sińirgen ártisi, Qazaqstannyń halyq ártisi, Parasat jáne Dostyq ordenderimen marapattalǵan.