InfoHub Logo

Túrkistan ındýstrıaldy-tehnıkalyq kolejiniń jataqhanasynda stýdent qyzdardy erler bólmeleri men dárethanalaryn tazalaýǵa májbúrlegeni týraly vıdeo áleýmettik jelide jarıalandy. Vıdeoda jataqhana komendantynyń qyzdarǵa «Sen qyz emessiń be?» dep aıqaılap, olardy erler bólmelerin jýýǵa kóndirýge tyrysqany kórinedi.

Bul týraly Infohub.kz aqparat agenttigi habarlaıdy.

Komendanttyń qyzdarǵa qysymy

Vıdeoda jataqhana komendantynyń stýdent qyzdarǵa: «Sen kúnde tazalamaısyń ǵoı. Erteń komısıa keledi, bólmeni jýsań ne bolady? Sen qyz emessiń be?» dep aıqaılap jatqany estiledi. Ol qyzdardy erler bólmeleri men dárethanalaryn tazalaýǵa májbúrlep, bas tartqan jaǵdaıda jataqhanadan shyǵaryp jiberetinin aıtyp qorqytqan.

«Men tek ózim turatyn bólmeni ǵana tazalaımyn. Nege biz jigitterdiń bólmelerin tazalaýymyz kerek? Jigitter kelgende ózderi tazalasyn», – dep jaýap bergen qyzdardyń biri.

Resmı jaýap

Túrkistan oblystyq bilim basqarmasy bul jaǵdaıdy baqylaýǵa alǵanyn jáne arnaıy komısıa qurylǵanyn habarlady. Kolejde 1072 stýdent oqıdy, onyń 80-i jataqhanada turady. Bilim basqarmasynyń málimetinshe, 23-25 aqpan aralyǵynda óńirde oblystyq spartakıada ótetindikten, oǵan qatysýshylardy jataqhanaǵa ornalastyrý qajettiligi týyndaǵan. Osyǵan baılanysty, bos bólmelerdi tazalaýǵa kómek surap, stýdentterge, sonyń ishinde qyzdarǵa da, aýyzsha ótinish jasalǵan. Jigitter ýaqytsha bolmaǵandyqtan, qyzdardan kómek suralǵan. Bul jaǵdaı túsinispeýshilikten týyndaǵan janjal ekeni aıtyldy.

Qazirgi ýaqytta stýdenttermen jáne olardyń ata-analarymen túsindirý jumystary júrgizilýde. Vedomstvo stýdentterdiń quqyqtary men qaýipsizdiginiń qamtamasyz etiletinin jáne jaýapty tulǵalarǵa zań aıasynda shara qoldanylatynyn atap ótti.