InfoHub Logo

Shymkentte eki kolejdiń basshylary men qyzmetkerleri memleketke tıesili 1,3 mıllıard teńgeden astam qarjyny jymqyrǵan. Qarjy monıtorıńi agenttiginiń málimetinshe, qylmystyq sqemany uıymdastyrǵan áıel úsh jyl boıy bas bostandyǵynan aıyrylǵan jerinde otyryp, syrttaı basshylyq etken.

Bul týraly Infohub.kz aqparat agenttigi habarlaıdy.

Qaltaly qylmyskerlerdiń aılasy

Tergeý málimetterine súıensek, 2018-2023 jyldar aralyǵynda «Ońtústik Qazaqstan joǵary medısınalyq koleji» JSHS jáne «Ońtústik Qazaqstan gýmanıtarlyq-qarjy koleji» JSHS-niń quryltaıshysy jalǵan stýdentterdi tirkep, memlekettik bilim berý tapsyrysy boıynsha qarjy alǵan.

Azamattardy stýdent retinde formaldy túrde tirkegenimen, olar is júzinde eshqandaı oqý prosesine qatyspaǵan. Bul arqyly memlekettik qarjyny, sonyń ishinde kadrlardy qaıta daıarlaý baǵdarlamalaryna bólingen qarajatty jymqyrǵan.

Qylmystyq sqemanyń egjeı-tegjeıi

Qarjy monıtorıńi agenttiginiń habarlaýynsha, qylmystyq sqemany júzege asyrý úshin jalǵan buıryqtar rásimdelgen, elektrondy sıfrlyq qoltańbalar paıdalanylǵan jáne oryndalǵan jumystar týraly jalǵan aktiler toltyrylǵan.

Sonymen qatar, medısınalyq kolejdiń aqyly bólimindegi keıbir stýdentterdi memleket esebinen oqıtyn stýdentter retinde kórsetken. Al «Ońtústik Qazaqstan gýmanıtarlyq-qarjy koleji» múldem jumys istemeı, tek búdjet qarajatyn alý úshin paıdalanylǵan.

Múlikti tárkileý jáne bultartpaý sharalary

Memleketke keltirilgen jalpy shyǵyn 1,3 mıllıard teńgeden asqan. Qylmystyq sqemany uıymdastyrǵan áıel úsh jyl boıy buryn jasaǵan qylmysy úshin sottalyp, túrmede otyrǵan kezinde de óz qyzmetin jalǵastyra bergen.

Tergeý barysynda kúdiktiler óz erikterimen 65 mıllıon teńge kóleminde zalaldy ótegen. Sot úsh páterdi (onyń ishinde Dýbaıdaǵy jyljymaıtyn múlik te bar), úsh turǵyn úı men úsh avtokólikti tárkileý týraly sheshim shyǵardy.

Eki kúdikti qamaýǵa alynyp, qalǵan úsheýine elden shyǵýǵa tyıym salý jáne tıisti minez-qulyq týraly qolhat túrinde bultartpaý sharasy tańdaldy. Qylmystyq is sotqa joldandy.