InfoHub Logo

Respýblıka boıynsha UBT testileýinen eń úzdik nátıje - 140 upaıǵa qol jetkizgen Qoja Ahmet Iassaýı atyndaǵy №123 mektep gımnazıanyń túlegi Shıara Qudaıbergenova Altyn belgi men úzdik atestatqa úmitker bolmaǵan. Bul týraly mektep dırektorynyń oqý isi boıynsha meńgerýshisi Elmıra Smaılova aıtty.

«Shıara Qudaıbergenova bul mektepte bastaýysh synyptan beri oqıdy. 10-synypta bir sabaqtan 4 alyp qalǵandyqtan Altyn belgige úmitker bola almady. Sondaı-aq, úzdik atestatqa da qol jetkizgen joq. Alaıda nátıjesin ózderińiz kórip otyrsyzdar, UBT boıynsha respýblıkadaǵy eń úzdik nátıjeni kórsetti. Sabaqtan bólek, qoǵamdyq jumystarǵa da belsene aralasady. Orys tilinen Halyqaralyq Olımpıadada 3-oryn alǵan. Shıara 5-11 synyptarda matematıka men fızıka pánderin tereńdetip oqyǵan. Matematıka pánine qabileti joǵary. Qazaq-orys-aǵylshyn tilderin erkin meńgergen», - deıdi Elmıra Smaılova.

Onyń aıtýynsha, Shıara L.N.Gýmılev atyndaǵy Eýrazıa ulttyq ýnıversıtetine túsýdi maqsat etip otyr.

Shıara Qudaıbergenova - otbasyndaǵy eki balanyń úlkeni. Onyń 8-synypta oqıtyn inisiniń de fızıka-matematıka ǵylymdaryna beıini joǵary.

Anasy Jansaıa Qoshqarbaevanyń aıtýynsha, Shıara UBT-ǵa 9 aı boıy úzdiksiz daıyndalǵan.

«Qyzym «Araı» mektebinde qosymsha daıyndaldy. Men onyń oqýyna barynsha jaǵdaı jasadym. Qysy-jazy, jaýynda da, ystyqta da oqýyn toqtatpady. Mektebinen kelgen soń tamaǵyn iship alyp, ekinshi mektebine daıyndyqqa ketetin. Bul - balanyń óziniń eńbegi» - dedi anasy.

Jansaıa Qoshqarbaevanyń otbasy testileýden soń meshitke baryp, shúkir namazyn oqyǵan. Sol sátte olarǵa «Araı» mektebinen habarlasyp, Shıaranyń maksımaldy 140 upaı jınaǵanyn aıtyp, súıinshi surapty.

 

«Biz alǵashynda senbedik. Óıtkeni, men qyzymdy qaı jaǵdaıǵa bolmasyn daıyndadym. «130-dan asyrsaq ta jaman emes, buıyrǵany bolady» dep kóńilin kóterýmen boldym. 140 upaıdy estigende qyzymnyń qýanyshynda shek bolmady», - deıdi anasy Jansaıa Qoshqarbaeva.

Eske sala keteıik,  UBT-2018 nátıjelerin endigi kezekte Telegram-bot @edu.gov.kz nemese edu.mail.kz saıty arqyly úıden shyqpaı-aq bilýge bolady: ol úshin testileýge qatysatyn árbir talapkerge beriletin TJK (test tapsyrýshynyń jeke kodyn) engizý qajet.

Sondaı-aq, testileý qorytyndylaryn Ulttyq testileý ortalyǵynyń saıtynan da bilýge bolady. Bul oraıda testileý nátıjelerin TJK arqyly árbir talapker ózi ǵana kóre alady.

Joǵaryda kórsetilgen resýrstarǵa UBT nátıjeleri aqparattyń óńdelýine qaraı jarıalanyp otyrady. Bıyl respýblıka boıynsha mektep bitirýshilerdiń 70%, ıaǵnı 102 myńy UBT tapsyrady. Mektep bitirgen 147 myń túlektiń basym bóligi UBT-ny qazaq tilinde tapsyrady. UBT-da jalpy 80 myń suraq bolady. 2018 jylǵa arnalǵan Ulttyq biryńǵaı test suraqtary 50 paıyzǵa jańartylǵan. Qazaqstandyq mektep bitirýshilerge Ulttyq biryńǵaı testileýden ótýge eki ret múmkindik beriledi. Ekeýinde de qajetti bal jınaı almaǵan balalar JOO-ǵa shartty túrde qabyldanady.

QazAqparat

---