InfoHub Logo

Elimizde taksı qyzmetine degen suranys pen baǵa birdeı ósti. Sońǵy tórt aıda taksımen júrgen jolaýshylar sany 70%-ǵa jýyq artsa, baǵa da aıtarlyqtaı kóterildi.

Bul týraly Infohub.kz aqparat agenttigi habarlaıdy.

Baǵanyń ósýine ne sebep boldy?

Finprom.kz sarapshylarynyń zertteýi boıynsha, 2026 jyldyń alǵashqy tórt aıynda taksı qyzmetin paıdalanǵandar sany 69,7%-ǵa kóbeıgen. Bul jalpy jolaýshylar tasymalyndaǵy taksıdiń úlesin 11,5%-ǵa jetkizdi. Sarapshylar mundaı ósimdi taksı naryǵynyń «kóleńkeden shyǵýymen» baılanystyrady. Platformalyq jumys júıesi engizilgen soń, resmı kirister men jolaýshylar aǵyny artqan.

Qaı óńirlerde qymbattady?

Sáýir aıynda taksı baǵasy ótken jylmen salystyrǵanda 16,1%-ǵa ósken. Eń joǵary ósim Aqmola oblysynda baıqaldy – 45,3%. Odan keıin Almaty qalasy (27,3%) jáne Atyraý oblysy (25,4%) tur. Astanada baǵa 18%-ǵa, Shymkentte 10,8%-ǵa kóterildi. Soltústik Qazaqstan oblysynda eń tómengi ósim – 2,2% tirkeldi.

Mamandardyń aıtýynsha, sońǵy bir jylda taksı baǵasy aı saıyn shamamen 1-2%-ǵa ósip otyrǵan. Ótken jyldyń maýsym aıynda bir aı ishinde 4,7%-dyq kúrt ósim bolǵan.

Baǵanyń ósýine janarmaı men avtokólik bólshekteriniń qymbattaýy, júrgizýshiler jalaqysynyń artýy jáne agregatorlardyń komısıasynyń kóbeıýi áser etken. Sonymen qatar, jeke tasymal qyzmetine suranystyń artqany jáne naryqtaǵy básekeniń álsizdigi iri tasymaldaýshylarǵa baǵany kóterýge múmkindik bergen.