InfoHub Logo

Bip sart qalaǵa bir esek, bir eshki satýǵa alyp keledi. Eshkiniń moınynda qońyraýy bar eken. Muny úsh ury kórip, bireýi aıtty:

— Men osy sarttyń ózine bildirmeı eshkisin urlap alamyn.

Ekinshisi aıtty:

— Men qolyndaǵy esegin urlap alamyn.

Úshinshisi aıtty:

— Onyń bári de qıyn emes, myna men sarttyń óziniń ústindegi kıimin de urlap alamyn.

Sol sózben bastapqy ury sarttyń artqy jaǵynan kelip, eshkiniń moınyndaǵy qońyraýdy alyp, esektiń quıryǵyna taqty da, eshkini jetektep dalaǵa alyp ketti. Birazdan soń sart artyna qarasa eshki joq. Sóıtip ań-tań bolyp turǵanda, ekinshi ury kelip: Neǵylyp tursyń? — dep surady. Sart:

— Eshkimdi aldyrdym, — dedi. Ury aıtty:

— Men kórdim, eshki jetektegen bireý jańa ǵana osy ormanǵa kirip ketti, qýsań jetesiń. Sart:

— Endeshe, qudaı úshin esegimdi ustaı tur, — dep, esegin uryǵa ustatyp, ózi aǵashqa júgirip kirgende, bul ury esekti alyp jóneldi.

Birazdan soń qaıtyp kelse, esegi taǵy joq. Munan soń sart baıǵus jylap, jolǵa túsip júre berdi. Sart sóıtip kele jatsa, jol ústinde, sýdyń jaǵasynda jylap otyrǵan bir adamǵa ushyrap, «nege jylap otyrsyń?» dep surady.

Ol kisi aıtty:

— Bir baıdyń qyzmetkeri edim, baı bir qapshyq altyn berip «qalaǵa alyp bar» dep jiberip edi. Osy sýdyń jaǵasyna jetken soń dem alaıynshy dep súıenip jatyp uıyqtap ketip, uıqysyrap abaısyz qapshyqty sýǵa ıterip jiberippin. Endi neǵylarymdy bilmeı otyrmyn.

Sart:

— Endeshe sýǵa nege túsip, altynyńdy almaısyń? — dedi.

Kisi aıtty:

— Júze bilmegennen sýdan qorqýshy edim, qapshyqty alyp bergen kisige 20 altyn berer edim.

Sart oılady:

— Esegim men eshkimdi aldyrǵan úshin maǵan bul Qudaıdyń jibergen oljasy shyǵar, qapshyǵyn áperip, 20 altyn alaıyn, — dep, jalmajan sheshinip, kıiminiń bárin tastap sýǵa tústi. Sý ishinde olaı-bulaı júzip, taıyz jerinde júrip izdese de qapshyq tabylmady.

Birazdan soń, sharshap qaıtyp kelse, kıimin manaǵy úshinshi ury alyp jónelgen eken.

---