InfoHub Logo

Bir jesir kempirdiń jurt aýzyna ilikken jalǵyz balasy bolypty. Ol kezdegi jaqsynyń ádeti — júırik minip, ıt júgirtip, qus salatyn. Kempirdiń balasynyń da bir júırik aty, ushar degen qumaı tazysy bar eken. Ásirese ushary qara jerden iz kesetin ańsaq, ıesine adal qaǵylez, qanjyǵanyń qanyn qurǵatpaıtyn joldy ıt bolsa kerek. Astyndaǵy aty, sońyndaǵy tazysy kelisken soń, jigit jıi-jıi ańǵa shyǵyp, saıatshylyq qurady eken.

Kúnderdiń bir kúninde jalǵyz jigit tosyn dertke shaldyǵyp, dúnıe salady. El aza tutyp, arýlap qoıady. Sonan soń burynǵy-sońǵynyń dástúri boıynsha, ólik shyqqan jurtty aýystyryp, aýyl qonysyn ózgertip, jańa jurtqa aýnap qonady.

Jańa jurtqa kelgen soń, jesir kempir «jalǵyzymnyń kózi ǵoı» dep, tazyny izdese joq deıdi. Sodan kóńili alań bolyp, tynshı almaı eski jurtqa kelse, ushar jas qabirdiń basynda ıesin qımaı ulyp otyr deıdi. Úshkir tumsyǵyn kókke qaratyp ulyp, ıesin joqtap sarnaǵan ushardyń daýysyn estigende jesir kempir:

Jalǵyzymnan aıyryldym,
Qanatymnan qaıryldym!
Ushar, Ushar, ká-ká! —
dep daýys qoıyp, ańyrap qoıa beredi. Eski jurtta jalǵyzynan aıyrylǵan sorly ana men ıesinen aırylǵan jetim tazy qosyla kúńirenedi.

Osy bir qaıǵyly haldi Qorqyt qobyzyna kúı etip shalǵan eken.

---